पोखरा । नेपाल मगर महिला संघको सातौंं राष्ट्रिय महाधिवेशन तयारी पूरा भएको छ । आगामी जेठ २२ देखि २२ सम्म पोखरा सभागृहमा हुने महाधिवेशनको सम्पूर्ण तयारी पूरा भएको आयोजकले पत्रकार सम्मेलन गरी जानकारी दिएको हो ।

महाधिवेशनमा देशभरका ५६ जिल्लाबाट कुल २ सय ५० जना प्रतिनिधिको सहभागिता रहने संघका केन्द्रीय अध्यक्ष विनाता आलेमगरले जानकारी दिइन् । सो कार्यक्रममा सातै प्रदेशका प्रदेश समिति र विदेश शाखा, विदेश महिला प्रमुख तथा महिला विभाग प्रतिनिधि र विभिन्न जिल्लाका प्रतिनिधीहरुको सहभागिता रहने छ ।

नेपाल मगर संघका केन्द्रीय अध्यक्ष ज्ञानेन्द्र पुनमगरको प्रमुख आतिथ्यमा हुने कार्यक्रम उद्घाटनपूर्व पोखरा रंगशाला गेट अगाडि रहेको नेपाल मगर संघ कास्कीको कार्यालयबाट सभागृहसम्म विभिन्न बाजागाजासहित ¥याली आयोजना गरिने आयोजनले जानकारी दिएको छ ।

यतिबेला नेपाल मगर महिला संघको सिंगो टोली पोखरामा छ । नेपाल मगर महिला संघले अझै २१ जिल्लामा आफ्नो संगठन विस्तार गर्न सकेको छैन । केन्द्रीय अध्यक्ष विनिता आलेमगरका अनुसार अहिलेसम्म ५६ जिल्लामा मात्रै जिल्ला समिति विस्तार गरेको छ ।

२०५५ सालमा स्थापना भए पनि मगर महिला संघले गण्डकी प्रदेशको मनाङ र मुस्ताङ लगायतको विभिन्न २१ जिल्लामा जनसंख्या र भौगोलिक बनोटका कारण संगठन विस्तार गर्न नसकेको बताइन् ।

संघले स्थापनाकालदेखि नै मगर महिलाहरुको हकहितमा काम गरिरहेको उनले बताइन् । महिलाको नेतृत्वदायी भूमिकाका लागि सशक्तीकरणका कार्यक्रमसँगै हरेक सुखदुखमा साथ दिंदै आएको उनको भनाइ थियो । आगामी दिनमा पनि सोही कार्यक्रमलाई निरन्तरता दिने अध्यक्ष आले मगरले बताइन् ।