पोखरा । पोखरा ७ मासबारस्थित सशक्त नमुना महिला समूह ११ औं वर्षमा प्रवेश गरेको छ ।

वार्षिकोत्सव अवसरमा आयोजित कार्यक्रममा बोल्दै नेपाल सरकार स्वाथ्य परियोजनाका योजना विज्ञ छवि गौडेलले समूहले उत्कृष्ट काम गर्दै आएको बताए । उनले महिलाहरु एकजुट भएर काम अगाडि बढाएमा जस्तोसुकै काम सहजरुपमा सम्पन्न गर्न सकिने बताए । उनले आफ्नो क्षेत्रबाट सक्दो सहयोग गर्ने बताए । सशक्त नमुना महिला समूहले नवनिर्वाचित पोखरा ७ का वडा सदस्यलाई सम्मान गरेको थियो । गौडेलले उनीहरुलाई सम्मान गर्दै वडा महिला समूहसँग मिलेर घर घरमा स्वास्थ्य सेवा पु¥याउन सकिने बताए ।

पोखरा ७ का वडा सदस्य विष्णुमणि बरालले अग्रजले वडा लिएको बाटो आफुहरुले लिने बताउँदै वडाको विकासमा लाग्ने बताए । अर्का वडा सदस्य बसुन्धरा लामिछानेले महिला समूहहरुलाई अझ सशक्त बताउन आफुहरु लाग्ने बताइन् ।

कार्यक्रममा महिला क्लब पोखरा ७ कि अध्यक्ष मीना आचार्य, महिला विकासका लागि आमा समूह पोखरा ७ कि अध्यक्ष मेनका बराल, मासबार आमा समूहकी अध्यक्ष टीकादेवी अधिकारी, जागरण बहुमुखी सहकारीका अध्यक्ष मोतिराम बराल, मदरल्याण्ड माविका प्राचार्य नारायण बराल लगायतले शुभकामना दिएका थिए । उनीहरुले महिला समूहहरुले महिला शक्तिकरण र आर्थिक वृद्धिमा उल्लेख्य भुमिका खेलेको बताएका थिए ।

कार्यक्रममा सशक्त नमुना महिला समूह अध्यक्ष विन्देश्वरी बराल संस्थाको उद्देश्य, उपाध्यक्ष निर्मला अर्याल बरालले स्वागत, कोषाध्यक्ष तारा बराल ढकालले आर्थिक विवरण र सचिव लक्ष्मी देवी बरालले कार्यक्रम संचालन गरेका थिए ।

कार्यक्रममा समूहका सदस्यका परिवारमा रहेका सबैभन्दा बृद्ध रामजी प्रसाद बराललाई दोसल्ला र अविरले सम्मान गरे । त्यसैगरी सबैभन्दा बढी उपस्थित हुने तारा बराल ढकाल र नियमित किस्ता बुझाउने अस्मिता अधिकारी, राधा बराललाई सम्मानपत्र र अविरले सम्मान गरे ।