पोखरा । दर्शन फाउन्डेशनको आयोजना तथा युनाइटेड रेफरेन्स ल्याबोरेटोरी (युआरएल) तथा जिल्ला स्वास्थ्य कार्यालय स्याङ्जाको प्राविधिक सहयोगमा स्याङ्जाको पुतलीबजार नगरपालिका वडा नं. ८ बहाकोटमा निशुल्क रगत तथा पाठेघरको मुखको क्यान्सरको निशुल्क स्वास्थ्य परीक्षण भएको छ ।

बहाकोटको भञ्ज्याङमा रहेको श्री नु बहाकोट मावि प्रांगणमा भएको कार्यक्रममा ३ सयभन्दा बढी सर्वसाधारणहरुले स्वस्थ्य जाँच गराएका थिए ।

प्रमुख अतिथि पोखरा स्वास्थ्य विज्ञान प्रतिष्ठानका वरिष्ठ फिजिसियन डा. कृष्णराज अधिकारीले कार्यक्रम उद्घाटन गर्दै रोग लाग्नै नदिनु सबैभन्दा उत्तम उपाय भए तापनि रोग लागि हाले पालेर राख्न नहुनेमा जोड दिए । उनले प्रायः नेपालीहरुलाई दैनिक खानपिन सम्बन्धी गलत सोचाइको कारण बिरामी भएको धेरै समयसम्म उपचार नपाउने गरेको बताए ।

कार्यक्रममा मुख्य प्राविधिक सहयोग गरेको संस्था युआरएलका अध्यक्ष ठाकुरप्रसाद पन्तले विभिन्न संघसंस्थाको सहकार्यमा संस्थाले सामाजिक उत्तरदायित्व अन्तर्गत ग्रामीण भेगमा बस्ने सर्वसाधारणलाई निशुल्क स्वास्थ्य परीक्षण गर्दै आएको बताए ।

पत्रकार कृष्ण रानाभाटले फिजिसियन डाक्टरसहितको स्वास्थ्य परीक्षण गाउँमै निशुल्क सेवा पाउनु नै ग्रामीण भेगमा बस्ने सबैलाई खुसीको कुरा भएको बताउँदै यस्तो अवसरको सबैले लाभ लिनुपर्ने बताएका थिए ।

कार्यक्रममा वडा कार्यालय, स्थानीय क्रान्तिदीप आमा समूह, क्रान्तिदीप युवा क्लब, बहाकोट स्वास्थ्यचौकी, बहाकोट कालिका एग्रो फर्म, धोवादी एग्रोले सहयोग गरकोमा प्रशंसापत्र प्रदान गरिएको थियो ।

कार्यक्रममा युआरएलका निर्देशक गणेशप्रसाद कोइराला, वडा सदस्य रवि सेन, श्री नु बहाकोट माध्यमिक विद्यालयका प्रधानाध्यापक श्यामकुमार थापाले शुभकामना व्यक्त गरेका थिए ।

दर्शन फाउन्डेशनका अध्यक्ष पितमबहादुर सेनको अध्यक्षतामा भएको कार्यक्रममा स्वागत गौतम सिंह ठकुरीले र सञ्चालन सचिव मदन मल्ल छाँयाले गरेका थिए ।