पोखरा । पोखरा महानगरपालिकाको ८ जना कार्यपालिका सदस्य चयन गर्न बुधबार भएको मतदानमा भोट क्रस भएको छ । मतदानमा नेकपा एमालेका उम्मेदवार निर्मल दियालीले आफ्नो दलको भन्दा बढी मत पाएका हुन् । महिला ५ र दलित वा अल्पसंख्यक ३ गरी ८ सदस्यका लागि भएको मतदानमा एमालेले प्यानलले नै जितेको छ ।

गत वैशाख ३० मा भएको स्थानीय तह निर्वाचनमा महानगरबाट निर्वाचित जनप्रतिनिधि नै मतदाता हुने व्यवस्था छ । महानगरमा मेयर, उपमेयर, ३३ वडाध्यक्ष र १ सय ३२ सदस्य गरी १ सय ६७ जना निर्वाचित भएका थिए । एमालेबाट उपमेयरसहित ८६, कांग्रेसबाट ७९, एकीकृत समाजवादीबाट १ (मेयर) र पोखरा–२२ बाट स्वतन्त्र उम्मेदवार निर्वाचित भए ।

नगरसभामा एमालेको बहुमत भए पनि कार्यपालिकामा उसको ३ मत क्रस भए गठबन्धनको बहुमत हुन्थ्यो । गठबन्धनतर्फका दलको कुल ८० मत हुन्छ । स्वतन्त्र उम्मेदवारको रुपमा विजयी पोखरा–२२ का वडाध्यक्ष हिमलाल बराल माओवादी केन्द्र निकट हुन् । यसकारण पनि उनले गठबन्धनलाई साथ दिने निश्चित थियो । हिमलालको १ मत जोड्दा गठबन्धनको ८१ मत थियो । नेकपा एमाले एक्लैको ८६ मत थियो । यसकारण मत सुरक्षित राख्न एमाले र कांग्रेस दुवैले निर्वाचित जनप्रतिनिधिलाई अघिल्लो दिन होटलमा राखेर मतदान प्रक्रिया र नमुना मतदानबारे सिकाएका थिए ।

महिला ५ र दलित वा अल्पसंख्यक ३ गरी ८ सदस्यमा एमालेको प्यानल नै निर्वाचित

मतपरिणाममा भने गठबन्धनबाटै मत क्रस भयो । दलित तथा अल्पसंख्यक सदस्यका लागि उम्मेदवारी दिएका एमालेका दियालीले आफूहरुको मतभन्दा १ मत बढी ल्याए । पोखरा २८ का निवर्तमान वडाध्यक्ष समेत रहेका दियालीले ८७ मत ल्याएका हुन् । निर्वाचित अन्य २ सदस्यले ८६ मत नै ल्याए । दियालीसहित एमालेका गोविन्द तुलाचन, दीपक घिमिरे निर्वाचित भए । निकटतम् प्रतिस्पर्धी समाजवादीका उम्मेदवारको ८१ मत थियो । उनीहरुका निकटतम् प्रतिस्पर्धी माओवादी केन्द्रका भीमबहादुर सार्कीले ७८, जसपाका पानबहादुर घर्तीले ८० र नेकपा एसका लालबहादुर विकले ८१ मत ल्याए ।

महिला ५ सदस्यमा एमालेकी धनकुमारी पोखरेल, निर्मला पौडेल, भीमकुमारी पुन गर्बुजा, मन्दिरा परियार र हरिमाया विश्वकर्माले समान ८६ मत ल्याउँदै निर्वाचित भए । निकटतम् प्रतिस्पर्धी कांग्रेस उम्मेदवार डाल्डादेवी भुजेल, दुर्गादेवी केसी थापा र पवित्रा थापाले समान ८१ मत ल्याउँदा रनसुवा गुरुङ ८० र भावना श्रेष्ठले ७९ मत ल्याए । कार्यपालिकामा ४३ सदस्यमध्ये ८ निर्वाचित र ३५ पदेन सदस्य हुने व्यवस्था छ । योसँगै नगर कार्यपालिकामा एमालेका १८ र कांग्रेसका २३, एकीकृत समाजवादी र स्वतन्त्रबाट १/१ जना भएका छन् ।