पोखरा । साहित्यकार कृष्णप्रसाद बस्ताकोटीको उपन्यास ‘नयाँ जातको रुख’ पोखरामा आइतबार लोकार्पण गरिएको छ । लोकार्पण गर्दै वरिष्ठ साहित्यकार सरुभक्तले उपन्यासको शीर्षक वातावरणमैत्री रहेको उल्लेख गर्दै प्राकृतिक वातावरणको संरक्षणमा ध्यान दिन सकिएन भने ठूलो विनाश भोग्नुपर्ने बताए ।

सरुभक्तले बस्ताकोटीसँग पोखरा सार्वजनिक पुस्तकालयमा सहकार्य गर्ने अवसर मिलेको स्मरण गरे । उनी अध्ययनशील लेखक भएको भन्दै नयाँ कृति आएकोमा सरुभक्तले खुसी व्यक्त गरे ।

ठूलो पदको जिम्मेवारी सम्हालेर काम गर्नु पर्दाको अवस्थामा पनि बुद्धिजीवीले समय निकालेर पढ्ने गरेको चर्चा गर्दै उनले आजकलका मान्छेलाई पुस्तक पढ्ने फुर्सद छैन, कसले पढ्छ ? भन्नु बकबास तथा वाहियात कुरा भएको धारणा राखे । जुवातास, जाँड, रक्सी आदि वाहियात कुरामा समय खेर फाल्न सक्ने तर पढ्न फुर्सद छैन भन्नु आफैंमा हास्यास्पद कुरा रहेको उनले उल्लेख गरे । साथै उनले पुस्तकले दिने ज्ञानको महत्व र आन्नद अरुबाट पाउन नसकिने बताए ।

पुस्तकको समीक्षा प्रस्तुत गर्दै डा.लक्ष्मीशरण अधिकारीले विद्यालयमा विद्यार्थीलाई अनुशासनका नाममा दमन होइन, सिर्जनशीलता र व्यावहारिक ज्ञान दिनुपर्ने सन्देश पुस्तकमा रहेको उल्लेख गरे । साथै उनले उक्त उपन्यास शिक्षकहरुले पढ्नै पर्ने कृति रहेको बताए ।

स्रष्टा कृष्णप्रसाद बस्ताकाटीले उच्च शिक्षा अध्ययन गरेको मानिस विनयशील हुनुपर्नेमा अहंकारी बनेको देखेपछि त्यही घटनालाई आधार बनाएर आफूले उपन्यास लेखेको बताए ।

शुभकामना मन्तव्य राख्दै कलाकार यादवचन्द्र भुर्तेलले पुस्तकै नपढी आफूले कभर डिजाइन गरे पनि विषयवस्तु मिलेको भन्दै खुसी व्यक्त गरे । पोखरा– २० का नवनिर्वाचित वडाध्यक्ष गंगाबहादुर केसीले पोखरा–१२ मा बसे पनि आफ्नो जन्मथलो भलामको गौरव बढाएको भन्दै स्रष्टाप्रति कृतज्ञता व्यक्त गरे ।

समारोहका अध्यक्ष तथा लेखनाथ साहित्य प्रतिष्ठानका अध्यक्ष पदमराज ढकालले प्रतिष्ठानलाई लोकार्पणको अवसर प्राप्त भएकोमा खुसी व्यक्त गरे । उपाध्यक्ष छबि सुवेदीको स्वागत मन्तव्य रहेको उक्त कार्यक्रमको सञ्चालन सचिव कृष्णप्रसाद पौडेलले गरेका थिए ।