पोखरा । आदिवासी जनजाति चलचित्र महासंघ गण्डकी अध्यक्षमा माओत्सेतुङ गुरुङ चयन भएका छन् ।

पोखरामा शनिबार महासंघ केन्द्रीय अध्यक्ष अमृतबहादुर सुनुवारको उपस्थितिमा भएको भेलाले उनको नेतृत्वमा सर्वसम्मत कार्यसमिति गठन गरेको हो । माओत्सेतुङ गुरुङ गुरुङ फिल्म एसोसिएसन नेपाल (जिफान) मा आबद्ध छन् ।
समिति उपाध्यक्षमा जिफानका सोम गुरुङ, मगर चलचित्रका सन्तोष पिठाकोटे मगर र नेवाः चलचित्रका विकास ताम्राकार चयन भए । महासचिव मगर चलचित्रका गोविन्द पुन मगर, सचिव जिफानका गल गुरुङ र राई चलचित्रका सूर्य सुनुवार, कोषाध्यक्ष जिफानका मीनु गुरुङ र सहकोषाध्यक्षमा भुजेल चलचित्रका बिमल भुजेल चयन भए ।

यसैबीच, गुरुङ फिल्म एसोसिएसन नेपाल (जिफान) ले पोखरामा गुरुङ चलचित्रसम्बन्धी विषयगत प्रशिक्षण गरेको छ । आदिवासी चलचित्र महासंघ अध्यक्ष अमृतबहादुर सुनुवारले प्रशिक्षण उद्घाटन गरेका थिए । जेठ १८ सम्म चल्ने प्रशिक्षणमा संस्थामा आबद्ध ५० जना फिल्मकर्मीको सहभागिता छ । जसमा कथा लेखन तथा निर्देशनबारे चलचित्र विज्ञ तथा निर्देशक राजेश गोंगजु, अभिनय तथा कलाबारे वरिष्ठ अभिनेता तथा रंगकर्मी प्रकाश घिमिरे, गीतसंगीत आवश्यकताबारे चलचित्र निर्देशक एवं संगीतकार कृष्णकुमार गुरुङले सहजीकरण गर्ने छन् ।

कार्यक्रमको अध्यक्ष जिफान नेपाल अध्यक्ष गुञ्जबहादुर गुरुङले गरेका थिए । स्वागत द्वितीय उपाध्यक्ष प्रेमबहादुर गुरुङ र संचालन महासचिव तोलबहादुर गुरुङले गरेका हुन् ।