पोखरा । बालबालिकाको क्षेत्रमा काम गर्दै आएको चिल्ड्रेन नेपालको आयोजनामा उद्घोषण तालिम सञ्चालन गरेको छ । एसइई दिएर बसेका किशोर किशोरीको बोल्ने कलाको विकास गर्दै उनीहरुमा आत्माविश्वास जागृत होस् भन्ने उद्देश्यले तालिम आयोजना गरिएको चिल्ड्रेन नेपालकी शारदा शार्माले बताइन् । रेडियो सफलताका संयोजक सञ्चारकर्मी मधु अधिकारीले तालिममा सहजीकरण गरेका थिए । उनले विद्यार्थीको उज्जवल भविष्यका लागि बोल्ने कला अपरिहार्य भएको बताए ।

चिल्ड्रेन नेपालका कार्यकारी निर्देशक डिल्ली शर्माले तालिमले सहभागी किशोर किशोरीको जीवनमा ठूलो अर्थ राख्ने विश्वास व्यक्त गरे । कार्यक्रम सञ्चालन तालिममा सहभागी प्रशिक्षार्थी कल्पना आसामीले गरिन् । तालिममा २५ जना सहभागी थिए ।