पोखरा । पोखरा वडा २ मा शुक्रबार पदभार ग्रहण गरेका वडाध्यक्ष दिवसमान प्रधानांगले पोखरा बाग्लुङ बसपार्क स्तरोन्नति गर्ने निर्णय गरेका छन् । उपत्यका नगर विकास समितिले भाडामा लिएको बसपार्कलाई नगरपालिकाको मातह ल्याई नमुना बसपार्क बनाउने गरी निर्णय भएको उनले बताए ।

‘आधुनिक बसपार्क बनाउन सरोकारवालासँग छलफल भइसकेको छ, प्रदेश सरकार पनि बजेट दिन तयार छ,’ वडाध्यक्ष प्रधानांगले भने, ‘अब हामी नेपालको मुख्य–मुख्य सहरमा बस छुटाउने र यात्रुलाई सुविधा दिने गरि काम सुरु गर्छौ ।’
वडाको पहिलो बैठकले जेष्ठ नागरिक, अपांगता, अशक्त व्यक्तिलाई निशुल्क स्वास्थ परीक्षण गर्ने, महिला बलबालिका तथा युवाको क्षमता अभिवृद्धि कार्यक्रम संचालन गर्ने, वडावासीलाई गुणस्तरीय शिक्षा र स्वास्थको सहज पहुँच पु¥याउने लगायत निर्णय गरेको छ ।

वडाध्यक्ष प्रधानांगले पोखरा २ लाई शिक्षा, कला, संस्कृति र धार्मिक पर्यटनको क्षेत्रका रुपमा विकास गरिने बताए ।

निवर्तमान वडाध्यक्ष रामेश्वर मल्लले वडाको विकासका लागि सबैको साथ र सहकार्य आवश्यक रहने बताए ।

नेपाल उद्योग वाणिज्य महासंघका पूर्व केन्द्रीय अध्यक्ष समाजसेवी आनन्दराज मुमीले वडाको गुणात्मक विकासका लागि वडाका कर्मचारी, नागरिक र जनप्रतिनिधिको भूमिका महत्वपूर्ण हुने बताए । कार्यक्रममा संविधानसभा सदस्य शारदा पौडेल, कांग्रेस पोखरा नगर सभापति सुरेन्द्रमान बिजुक्छे, कांग्रेस कास्की क्षेत्र ३ का सभापति मनोज गुरुङ, पत्रकार महासंघका केन्द्रीय सदस्य सरिता तिम्सिना पगेनी, कांग्रेस पोखरा २ का सभापति अरुण कायस्थ, एमाले वडा कमिटी अध्यक्ष दीपक शाह, नेकपा एसका खगेन्द्र पराजुली, माओवादी केन्द्रका रुपलाल सुनार, राप्रपाका अरुणविक्रम राणा, शिक्षासेवी वसन्त पान्डे लगायतले शुभकामना मन्तव्य राखेका थिए ।