खैरेनीटार । शुक्लागण्डकी नगरपालिकामा स्थानीय तह निर्वाचन–२०७९ बाट निर्वाचित जनप्रतिनिधिको सोमबार पदस्थापना भएको छ ।

नगरको मेयरमा गठबन्धनतर्फबाट नेपाली कांग्रेसका कृष्णराज पण्डितले नेकपा एमालेका मुक्तिनाथ तिम्सिनालाई पराजित गरी निर्वाचित भएका हुन् । उपमेयरमा गठबन्धनबाटै नेकपा (माओवादी केन्द्र) का खुमबहादुर बिक (राजु) निर्वाचित भएका हुन् । उनले एमालेबाट उम्मेदवार फूलमाया वाग्लेलाई हराएका थिए । मेयर र उपमेयरको पदस्थापनापछि नगरका १२ ओटा वडामा जनप्रतिनिधिको पदस्थापना गरियो ।

शुक्लागण्डकी वडा १, २, ३, ४ र ७ मा कांग्रेसका उम्मेदवारले जीत हासिल गरेका छन् भने नेकपा एमालेका उम्मेदवारले वडा ५, ६, ८, ९, ११ र १२ मा जीत हासिल गरेका छन् । वडा १० मा माओवादी केन्द्रका उम्मेदवार विजयी भएका छन् ।
शुक्लागण्डकी ६ मा नवनिर्वाचित वडाध्यक्ष र सदस्यलाई निवर्तमान वडाध्यक्ष कृष्णबहादुर पौडेलले पदस्थापन गराउँदै नमुना वडा बनाउनेतर्फ ध्यान दिन आग्रह गरे । उनले वर्तमान अवस्थामा कृषिलाई प्राथमिकता दिनुपर्नेमा जोड दिए । एमाले नगर कमिटी अध्यक्ष मुक्तिनाथ तिम्सिनाले जनमतलाई सम्मान गरी साझा बन्न आग्रह गरे ।

कार्यक्रममा वडाध्यक्ष बुद्धिबहादुर थापाले ‘सुन्दर सहर, हाम्रो रहर’ अनुरुप सुखी वडावासी समृद्ध वडा बनाउनेतर्फ आफ्नो ध्यान केन्द्रित हुने बताए । उनले चुनावको बेला जनाएका प्रतिवद्धता प्राथमिकता आधारमा कार्यान्वयन गर्दै लैजाने प्रतिबद्धतासमेत जनाए । यसैबीच उनले एसिया टेक्निकल ट्रेनिङ इस्टिच्युटका प्रबन्ध निर्देशक विजयराज वाग्लेसँग वडाका २ सय जना बेरोजगार युवालाई निशुल्क विद्युत जडान, एड्भान्स सिलाइ कटान, प्लम्बर, फेसन डिजाइन लगायतका ट्रेनिङ दिन सम्झौता गरेका छन् ।

कार्यक्रममा नगरपालिकाका निवर्तमान प्रवक्ता एवं एमाले तनहुँ कमिटी उपसचिव खिमबहादुर कुमालले समग्र वडाका जनताको पक्षमा कार्य गर्न सुझाव दिए ।

कार्यक्रममा बुद्धिजीवी परिषद तनहुँ अध्यक्ष केशवराज घिमिरे, एमाले जिल्ला कमिटी सदस्य विष्णुमाया पराजुली, कांग्रेसकी देवी थापा, एमाले वडा ६ कमिटी उपाध्यक्ष रुपा राना, राष्ट्रिय जनमुक्ति पार्टीकी दुर्गा थापा, वडा कार्यालय सचिव शारदाकुमारी तिम्सिना लगायतले बोलेका थिए ।