पोखरा । बेलायतमा च्यारिटी कमिसनमा रजिस्टर भएको संस्था साेंपाल समाज युकेले आँधीखोला गाउँपालिका १ बेझाङको आधारभूत विद्यालयलाई सहयोग गरेको छ । पोखरामा आइतबार कार्यक्रम गरी विद्यालयलाई आधुनिक खेल मैदान तथा भवन निर्माणको निम्ति सहयोग रकम हस्तान्तरण गरेको हो ।

लामो समयदेखि अघि बढ्न नसकेको उक्त खेल मैदानलाई त्यहाँका युवा अभियन्ता राजेन्द्र गुरुङ, गमबहादुर गुरुङ, भरत गुरुङ र विनप्रसाद गुरुङले नयाँ परिकल्पनासहित अघि बढाउने जमर्काे गरेका थिए ।

कार्यक्रममा बेझाङ लेम्मे भाइखलक बहुउद्देश्यीय भवनका अध्यक्ष चन्द्रमान गुरुङलाई उक्त खेल मैदान निर्माण र विद्यालय मर्मतको निम्ति सोंपाल समाज युकेका संरक्षक तथा सल्लाहकार दीपक गुरुङ (डेभिड) ले सहयोग रकम ५ लाख २० हजार ३ सय ५३ हस्तान्तरण गरेका हुन् । यसैबीच सोंपाल समाज हङकङमा जम्मा भएको सहयोग रकम ३ लाख ९७ हजार ९ सय ५० हङकङ सोंपाल समाजका कोषाध्यक्ष गमबहादुर गुरुङले हस्तान्तरण गरे ।

कार्यक्रममा सहभागी युवाहरूले खेलमैदान बनाउने सपना साकार भएपछि जिल्ला स्तरीय खेलकुद कार्यक्रम आयोजना गर्ने उद्घोष गरे । सोही अवसरमा सोंपाल समाज युकेका संरक्षक दीपक गुरुङ (डेभिड) ले उक्त कार्यक्रमको पुरस्कार प्रायोजनको अवसर आफूलाई दिन आग्रह गर्दै आफ्ना बुबा भूपू प्रधानपञ्च स्व. लालबहादुर गुरुङ र आमा स्वर्गीय उजेली गुरुङको नाममा प्रायोजन गर्ने उल्लेख गरे ।

कार्यक्रममा सोंपाल समाज पोखराका संरक्षक ए एसपी किशोर गुरुङलगायत समाजका सल्लाहकार एवं पदाधिकारी सदस्यको समेत उपस्थिति थियो ।

कार्यक्रमको समापन गर्दै बेझाङ लेम्मे भाइखलक बहुउद्देश्यीय भवनका अध्यक्ष चन्द्रमान गुरुङले बालबालिका र युवाहरूको भविष्यका निम्ति गरिएको सहयोग र आफ्नो गाउँप्रतिको प्रेमका निम्ति सोंपाल समाज युकेका अध्यक्ष श्रीप्रसाद गुरुङ र उनको कार्यसमिति तथा सोंपाल समाज हङकङका अध्यक्ष यमबहादुर गुरुङ र उनको कार्यसमितिप्रति आभार व्यक्त गरे ।