हेमजा । हेमजाको सुइँखेतमा यतिबेला काँक्रोको उत्पादन अत्यधिक छ । तर काँक्रोले उचित मूल्य नपाउँदा किसान मर्कामा परेका छन् ।

किसानले प्रतिकिलो ५ देखि १० रुपैयाँसम्ममा काक्रो बिक्री गछौंभन्दा पनि बिक्री हुने अवस्था छैन । लगानी नउठ्ने जोखिम त बढेको छ नै उत्पादित काँक्रोसमेत खेर जाने अवस्थामा पुगेको स्थानीय गंगा बराल अधिकारीले गुनासो गरिन् । ‘पोहोर, परार मूल्यको यस्तो समस्या थिएन । अहिले पनि सुरुसुरुमा प्रतिकिलो २० देखि ३० रुपैयाँ परेकै थियो । अहिले भने ५/१० रुपैयाँमा किनेर खाने/लाने मानिस पनि कोही छैनन् जस्तो लाग्दै छ,’ उनले भनिन् ।

काँक्रो बिक्री हुन छाडेपछि किसान सुइँखेतस्थित पोखरा–बाग्लुङ राजमार्ग क्षेत्रमा दिनहुँजसो ग्राहक प्रतीक्षामा रहने गरेका छन् । कतिपयको खेतबारीमै कुहिने गरेको छ भने बस्तुभाउलाई खुवाउन पनि थालेका छन् । करिब १ सय बढी घरपरिवार किसानले २ सय रोपनी बढीमा यो खेती लगाएका छन् ।