पोखरा । पोखरा महानगरपालिकाको मेयर र उपमेयरमा सत्ता गठबन्धनले अग्रता कायमै राखेको छ ।

मेयरमा ३ हजार ४ सय ४२ मतान्तरले नेकपा (एकीकृत समाजवादी) ले अग्रता कायमै गर्दा उपमेयरमा नेपाली कांग्रेस ८४ मतले अघि छ ।

मेयरमा एकीकृत समाजवादीका धनराज आचार्यले शुक्रबार साँझ ७२ हजार ९ सय १८ मतगणनामा २९ हजार ८ सय ७ मत प्राप्त गरेका छन् । उनका निकटतम् प्रतिस्पर्धी नेकपा एमालेका उम्मेदवार कृष्ण थापाले २६ हजार ३ सय ६५ मत प्राप्त गरेका छन् ।

राप्रपाका शंकर खरालले ३ हजार १ सय ४५ र स्वतन्त्रका उम्मेदवार गनेस पौडेलले १ हजार ९ सय ६६ मत प्राप्त गरेका छन् । उपमेयरमा कडा प्रतिस्पर्धा छ । सत्ता गठबन्धनबाट नेपाली कांग्रेसकी उम्मेदवार कोपिला रानाभाट ७२ हजार मतगणना हुँदा मात्र ८४ अन्तरले अघि छिन् । उनले ३० हजार २ सय ६० मत प्राप्त गर्दा एमालेकी मञ्जुदेवी गुरुङले ३० हजार १ सय ७६ मत ल्याएकी छन् । राप्रपाकी रञ्जना सेनले २ हजार ९ सय ६९ ल्याउँदै तेस्रो स्थानमा छिन् ।

स्थानीय तह निर्वाचनअन्तर्गत शुक्रबारको मतदानमा पोखरा महानगरपालिकामा २ लाख ७ हजार मतदातामध्ये १ लाख ४३ हजार मत खसेको थियो । शुक्रबारसम्म आधा मतगणना सकिएको छ । अझै ७० हजार मत गन्न बाँकी छ । मुख्य निर्वाचन अधिकृतको कार्यालयका अनुसार यही गतिमा मतगणना भएमा पोखरा महानगरको गणना सकिन अझै ३÷४ दिनको समय लाग्नेछ । २०७४ सालको चुनावमा जिल्लामा ७५ प्रतिशत मतदान भएको थियो । त्यसबेला मेयर–उपमेयरको छिनोफानो हुन १४ दिन लागेको थियो ।