पोखरा, १ जेठ । पोखरा महानगरपालिकाको मेयरमा सत्ता गठबन्धनका उम्मेदवारले अग्रता लिंदा उपमेयरमा एमालेले अग्रता कायम राखेको छ ।

आइतबार बिहानसम्म १ हजार ६ सय मतगणनामा सत्ता गठबन्धनतर्फका साझा उम्मेदवार नेकपा (एकीकृत समाजवादी) का धनराज आचार्यले ६ सय १३ मत प्राप्त गरेका छन् ।

उनका निकटतम् प्रतिस्पर्धी नेकपा एमालेका कृष्ण थापाले ५ सय ८३ मत ल्याएका छन् । दुवै बीच कडा प्रतिस्पर्धा हुँदा एकआपसमा पछ्याउने गरेका छन् ।

यसैगरी, राप्रपाका शंकर खरालले ९८ प्राप्त गर्दा स्वतन्त्र उम्मेदवार गनेस पौडेलले ३६ मत पाएका छन् ।

उपमेयरमा एमालेकी मञ्जुदेवी गुरुङले ८ सय ८३ मत र सत्ता गठबन्धनबाट साझा उम्मेदवार नेपाली कांग्रेसकी कोपिला रानाभाटले ७ सय १६ मत प्राप्त गरेकी छन् । राप्रपाकी रञ्जिता सेनले ८२ मत पाएकी छन् ।

पोखरा महानगरका कुल ३३ वटा वडामध्ये वडा नम्बर १, २ र १२ को मात्र मतगणना भइरहेको छ । वडा २३ को गणनाका लागि मतगणना स्थलमा बस्न प्रतिनिधिलाई सूचित गरिएको छ ।

सहिदचोकस्थित मुख्य निर्वाचन अधिकृतको कार्यालय रहेको पोखरा उपत्यका नगर विकास समिति र जिल्ला समन्वय समिति (जिसस) को भवनमा मतगणना भइरहेको छ ।