लमजुङ । हिमालपारीको जिल्ला मनाङमा जिल्ला निर्वाचन कार्यालयले स्थानीय तह निर्वाचनमा बदर मत कम गर्ने उद्देश्यले नमुना मतदान गरिएको छ । सो अवसरमा कुल ३४ मत खसेकोमा ३ मत मात्र बदर भयो ।

निर्वाचनका समयमा नयाँ मतदाता तथा पुराना पनि अलमलमा परेका मतदाताको सहजताका लागि नमुना मतदानको अभ्यास गरिएको मनाङका जिल्ला निर्वाचन अधिकारी पुष्पराज शर्माले बताए ।

उनका अनुसार यसपटक मतदाता शिक्षा पनि नभएकाले नागरिकमा मतदानप्रति सचेतना ल्याउन नमुना मतदान गराइएको हो । उनले भने, ‘नमुना मतदानमा ३४ जना मतदाताले भाग लिएका थिए । तीमध्ये ३ जनाको मतमात्र त्यो पनि आंशिक बदर भएको पाइयो ।’ मतदानमा सहभागीमध्ये कसैको पनि मत पूर्ण बदर भएको पाइन उनले उल्लेख गरे ।

नमुना मतदानमा महिला पुरुष, अशक्त र बृद्धवृद्धाको लाइन मिलाउने मतदान अधिकृतको हस्ताक्षर रुजु गर्ने, गोप्य स्थानमा पुगी उम्मेदवारको चुनाव चिन्हमा मत दिनु पर्ने जस्ता विधिबारे सिकाइएको मनाङका मुख्य निर्वाचन अधिकृत पुनराम खनालले बताए । उनका अनुसार मत बदर नहुने गरी मतपत्र पट्याउन समेत सो अवसरमा सिकाइएको थियो । उक्त नमुना मतदानमा मुख्य निर्वाचन अधिकृति एवं जिल्ला न्यायाधीश पुनराम खनालका अतिरिक्त प्रमुख जिल्ला अधिकारी रवीन्द्र आचार्य सुरक्षा निकायका प्रमुख, म्यादी प्रहरीका साथमा स्थानीयको सहभागिता थियो ।