पोखरा । नेकपा एमाले स्थायी कमिटी सदस्य एवं संगठन विभाग प्रमुख खगराज अधिकारीले स्थानीय तहको निर्वाचनमा नेकपा एमालेलाई भोट दिइ विकास र समृद्धिको नेतृत्व सुम्पन आग्रह गरेका छन् ।

एमाले पोखरा ३१ ले बेगनासतालको मोहोरियामा आयोजना गरेको उम्मेदवार परिचयसहितको आमसभामा बोल्दै उनले मतदातासमक्ष सो आग्रहग रेका हुन् ।

यतिबेला गठबन्धनभित्र कुन चुनाव चिन्हमा मतदान गर्ने भन्ने अन्यौल रहेको टिप्पणी गर्दै उनले अन्यौल नभएको सूर्यमा मतदान गरी एमालेलाई विकास र समृद्धिको नेतृत्व सुम्पनसमेत आग्रह गरेका हुन् । उनले पोखराको महानगरमा अनुभवी मेयरमा कृष्णबहादुर थापा र उपमेयरमा मञ्जुदेवी गुरुङलाई उम्मेदवारको रुपमा अघि सारेको भन्दै एमालेको जीत सुनिश्चित रहेको दाबी पनि गरे ।

मेयरका उम्मेदवार थापाले लेखनाथ क्षेत्रलाई आफूले प्राथमिकताका साथ हेरेको बताए । बेगनासताल र फेवातालबीच पर्यटकीय रुपमा जोड्न यातायातको सहज र द्रुत सेवा पनि आफ्नो योजनामा रहेको भन्दै थापाले एमालेकै नेतृत्व पालामा तालचोक बेगनास ताल सडक ४ लेन बनाउने कामको टेण्डर सम्झौता भइसकेकोले छिटै काम सुरु हुने दाबी गरे ।

उपमेयर पदका उम्मेदवार गुरुङले विभिन्न अप्ठेराबीच गएको ५ वर्षमा एमाले नेतृत्वको महानगर टिमले सम्झनलायक धेरै काम गरेको दाबी गरिन् ।

पोखरा ३१ मा वडाध्यक्षका उम्मेदवार चिरञ्जीवी बञ्जराले पोखरा ३१ मा मतदाताको उत्साहजनक प्रतिक्रिया पाएको भन्दै जीत सुनिश्चित भएको बताए । पार्टीले आमसभा, कोणसभा, मतदाता भेटघाट एवं घरदैलो कार्यक्रमलाई जारी राखेको प्रचारप्रसार समितिा संयोजक एवं वडा कमिटीका सचिव पुरुषोत्तम अधिकारीले जानकारी दिए ।

यसैबीच, पोखरा १९ ले लामाचौरमा आयोजना गरेको चुनावी सभामा बोल्दै एमाले पोलिट्ब्युरो सदस्य जगतबहादुर विश्वकर्माले देशव्यापी रुपमा देखिएको जनलहरले एमालेको जीत सुनिश्चित भएको दाबी गरे । उनले एमालेविरुद्ध बनेको गठबन्धन दिनप्रतिदिन कमजोर बन्दै गइरहेको पनि बताए ।

पोखराको मेयरका प्रत्यासी कृष्णबहादुर थापाले समृद्ध पोखरा निर्माणका लागि आफूले थुप्रै योजना सार्वजनिक गरेको बताउँदै त्यसको कार्यान्वयनमा एमालेको जीत आवश्यक रहेको बताए । उनले पोखरा १९ का अधिकांश ग्रामीण क्षेत्रमा सुरुआत भएका विकासका पूर्वाधारलाई निर्माण सम्पन्न गर्न वडासँग समन्वय गरिने बताएका छन् ।

उपमेयर उम्मेदवार मञ्जुदेवी गुरूङले आफूले ५ वर्षको कार्यकालमा थुप्रै काम गरेकोे बताउँदै थप समृद्ध पोखरा निर्माणका लागि एमालेको जीत आवश्यक भएको बताइन् ।

पार्टीका कास्की जिल्ला कमिटी अध्यक्ष मनबहादुर गुरूङले पोखराको व्यवस्थित विकासको योजना एमालेसँगमात्र भएको दाबी गरे । पोखरा १९ बाट वडाध्यक्ष उम्मेदवार इमानराज पौडेलले जनताको शिरलाई उँचो राख्ने गरी जनजीविका योजनालाई प्रथामिकताका साथ अगाडि बढाउने बताए ।