पोखरा, २४ बैशाख । राप्रपा अध्यक्ष राजेन्द्र लिङ्देनले आगामी चुनावमा भ्रष्ट नेता हराउन आह्वान गरेका छन् । उनले आफ्नो पार्टीलाई ‘नष्ट हुन दिने तर भ्रष्ट हुन चाहीँ नदिने’ पनि दाबी गरे ।
पोखरामा शनिबार चुनावी सभालाई सम्बोधन गर्दै उनले अहिलेसम्म ठूला भनिएका एमाले र काँग्रेसका जनप्रतिनिधिले कर बढाउने र भ्रष्टाचार गर्ने बाहेक केही काम गर्न नसकेको आरोप लगाए ।
उनले भने, ‘पोखरामा अहिलेसम्म राप्रपाले राम्रो मत ल्याउन सकेको छैन । यो पटक राप्रपाका उम्मेदवारलाई भोट हालेर जिताउनुहोेस्, महानगर भ्रष्टाचारमुक्त हुने कुराको जिम्मा म लिन्छु ।’

लिङ्देनले हल्लाखल्ला बिनै खुसुक्क राप्रपालाई मत दिन मतदाताहरुसमक्ष आग्रह गरे । ‘मतदाताहरुले राप्रपाको चुनाव चिन्हमा छाप लगाएर एमाले र काँग्रेसलाई पत्तासाफ बनाउन म आग्रह गर्दछु । जम्मा एकचोटी राप्रपालाई जिताइदिनुहोस्,’ लिङ्देनले भने, ‘अर्कोपटकबाट हाम्रा उम्मेदवारहरु यसो गर्छु भन्दै तपाईकहाँ भोट माग्न आउने छैनन् । जनताले स्वतस्फूर्त रुपमा हामीलाई नै निरन्तर भोट दिनेछन् ।’

उनले आफू बाँचुञ्जेल भ्रष्टाचारविहिन राजनीतिमा समर्पित हुने पनि दोहो¥याए । उनले आफू यो जुनीमा मात्रै नभएर अर्को जुनीमा पनि इमानदारिताको राजनीति गर्ने बताए । लिङ्देनले पछिल्लो समय पार्टीप्रति जनताको आकर्षण बढेको बताउँदै केही समयमै पार्टीले देशकै सबैभन्दा ठूलो पार्टीको आकार लिने दाबी समेत गरे ।

अभिनेतृसमेत रहेकी राप्रपानेतृ रेखा थापाले जनताको मुहारमा खुसी दिन राप्रपा जनताको माझ आएको बताइन् ।

राप्रपाबाट पोखरा महानगर प्रमुख पदका उम्मेदवार शंकर खरालले अन्य पार्टीको नेतृत्व जनताले हेरिसकेकाले अब पर्यटकीय सहरलाई थप सुन्दर र भ्रष्टाचारमुक्त बनाउन राप्रालाई मत दिन अपिल गरे । महानगरमा उपप्रमुख उम्मेदवार रञ्जना सेन पौडेलले आफूहरूले राष्ट्रियताको सवाल स्पष्ट धारणा लिएर जनतामाझ पुगेको बताउँदै आफूहरूलाई जनताका साथ रहने विश्वास व्यक्त गरिन् ।
सो अवसरमा करि ७ सय जना युवाा राप्रपामा प्रवेश गरेको राप्रपा कास्कीका प्रवक्ता अरुण गिरीले जानकारी दिए ।