पोखरा । पोखरा महानगरमा नेकपा एमालेतर्फबाट मेयरका उम्मेदवार कृष्ण थापाले पोखरालाई महानगर बनाउन महत्वपूर्ण भूमिका खेलेको लेखनाथको विकासमा कुनै कसर बाँकी नराख्ने बताएका छन् ।

उनले आफू निर्वाचित भए लेखनाथको विकास गर्ने थुप्रै परियोजना सञ्चालन गर्न दातासँग वार्ता गरिरहेको बताए । यसका लागि लेखनाथको मुख्य बजारमध्येको शिशुवामा भौतिक तथा मानवीय पूर्वाधार विकासका लागि निर्वाचन लगत्तै २ अर्ब रुपैयाँ विनियोजन गर्ने प्रतिवद्धता व्यक्त गरेका छन् ।

उनले पोखराको समृद्धि र विकासका लागि केही काम कोभिड लगायतका विभिन्न अप्रिय परिस्थितिका कारण अधुरा रहेको भन्दै ती काम पूरा गर्न थकाई नमारिकन लागिपर्ने बताएका छन् । पोखराका आमजनताले भोगेका समस्या समधान गर्ने आफ्नो पहिलो प्राथमिकता रहने पनि उनले बताएका छन् ।

उपमेयर उम्मेदवार मञ्जुदेवी गुरुङले स्थानीय सरकार प्रमुख भएर जिम्मेवारी सम्हाल्दाका अनुभव सुनाउँदै पोखराको समृद्धि धेरै टाढा नभएको बताइन् । यहाँका विकासमा देखिएका प्रायः सबै समस्या पहिचान भइसकेकाले जनताले मौका दिएमा अझै उत्कृष्ट कार्य सम्पादन गर्ने प्रतिवद्धता व्यक्त गरिन् ।

सभामा प्रतिनिधिसभा सांसद खगराज अधिकरी, पोखरा ३० मा अध्यक्षका उम्मेदवार सोमलाल बास्तोला, एमाले पोखरा ३० का अधयक्ष कृष्ण अधिकारी लगायतले बोलेका थिए ।