पोखरा । कास्कीको रुपा गाउँपालिकामा नेकपा (एमाले) तर्फबाट अध्यक्षका उम्मेदवार नवराज ओझाले आसन्न स्थानीय तहको निर्वाचनमा आफू निर्वाचित भए बुढाबुढीका लागि घरघरमा निशुल्क डाक्टर पठाउने घोषणा गरेका छन् ।

रुपाको चिसापानीमा एमाले वडा कमिटीद्वारा शुक्रबार आयोजित कोणसभामा बोल्दै नेता ओझाले ६० वर्षमाथिका बुढाबुढी बिरामी भए उनीहरुको उपचारका लागि घरमा नै डाक्टर पठाउने प्रतिबद्धता जनाए । गाउँमा डाक्टरबाट उपचार सम्भव नभए गाउँपालिकाको एम्बुलेन्सले बजारका ठूला अस्पतालमा बिरामीलाई निशुल्क पुर्‍याउने आश्वासन पनि उनले दिए । चिसापानीमा ६० शैयाको अस्पताल बनाउने र आउँदो वर्ष २५ शैया बनाउन काम थाल्ने दाबी उनको थियो ।

उनले गाउँमा आफूहरुले केही न केही विकास गरेर फरक अवस्था सिर्जना गरेको बताए । चिसापानी र भिरचोक लगायत सिंगो रुपा गाउँपालिका पर्यटकीय क्षेत्र भएको भन्दै उनले सूर्यमा भोट हालेर यो क्षेत्रलाई थप विकास गर्ने वातावरण सिर्जना गर्न मतदातासँग आग्रह गरे । जात, थर र नातागोता हेरेर भन्दा पनि आफ्नो र उक्त ठाउँको भविश्य हेरेर भोट दिन आग्रह उनले गरे ।

रुपा गाउँपालिकामा दोस्रो कार्यकालका लागि उम्मेदवारी दिएका एमाले जिल्ला कमिटी उपसचिव ओझाले आफ्नो कार्यकालमा बाटो पिच भएको, खानेपानी ल्याइएको, भिरचोक माथिको थाप्लेडाँडाको विकास गरिएको, गुम्बा निर्माण गरिएको र होमस्टेको विकास गरिएको लगायत विकास निर्माणका काम स्मरण गराए । पालिकाका अन्य ठाउँमा भएका विकासका कामको किताव नै तयार गरिएको पनि उनले सुनाए ।

चिसापानीमा ६० शैयाको अस्पताल बनाउने र आउँदो वर्ष २५ शैया बनाउन काम थाल्ने उनको दाबी छ

आफूले यतिधेरै विकास गरेको भन्दै यहाँ आएर गाली गर्नेलाई भोट दिने कि काम गर्नेलाई भनी प्रतिप्रश्न गरे । उनले गाउँपालिकाको भवन चिसापानीमा बनाउने, कोल्डस्टोर निर्माण गर्ने र चिसापानीलाई पर्यटनको हव बनाउने घोषणा पनि गरे । चिसापानी क्षेत्र तत्कालीन बेलायती युवराज चाल्र्सले भ्रमण गरेपछि रोयल ट्रेकको नामले परिचित क्षेत्रको एक भाग पनि हो ।

नेता ओझाले आफूहरुले अरु कुनै दललाई गाली नगर्ने बताउँदै झण्डा कांग्रेस वा माओवादी जसको टाँगे पनि भोट भने सूर्यमा हाल्न आव्हान गरे । घरघरमा रोजगारी सिर्जना गरेर पैसा फलाउने वातावरण सिर्जना गर्ने भन्दै उनले युवालाई उद्यम सिकाउने, आवश्यक तालिम प्रदान गरिने र ऋण दिने बताए ।

गाउँपालिकाका २५ वटा डाँडा जोडेर पर्यटकीय मार्ग सिर्जना गर्न ३ अर्ब रुपैयाँको योजना अघि सारिएको बताउँदै उनले त्यसका लागि पहिलो डाँडा चिसापानी हुने उनले उद्घोष गरे । लिफ्ट गरेर गाउँमा ल्याइएको पानीको बिल र बिजुलीको न्युनतम शुल्क समेत निशुल्क गरिने र त्यो पैसा गाउँपालिकाले तिरिदिने आश्वासन पनि उनले दिए ।

चिसापानीबाट मोहोरियासम्म मोटरबाटो बनाएर पहिलो वर्ष ग्राभेल गर्ने, खानेपानी थाप्लेडाँडासम्म पुर्‍याउने, चिसापानीमा दुईतले समाज घर बनाउन सघाउने र गाउँमा विकास गरेर चिसापानीको जनता हुँ भनी गर्भले छाती फुलाएर हिंड्न सक्ने आफूले बनाउने सपना पनि उनले बाँडे ।

सो अवसरमा प्रदेश कमिटी सदस्य सवाबक्स मियाँ, जिल्ला सचिवालय सदस्य एवं गाउँपालिकामा एमालेबाट उपाध्यक्ष पदकी उम्मेदवार लालसुबा गुरुङले पनि भनाइ राखेका थिए । वडा कमिटीका अध्यक्ष ज्ञानेन्द्र सुवेदीको अध्यक्षतामा भएको कार्यक्रमको संचालन स्थानीय केशवहादुर गुरुङले गरेका थिए ।