पोखरा । स्थानीय तहको मतदान मिति नजिकिंदै जाँदा उम्मेदवार आ–आफ्नो क्षेत्रको घरदैलो कार्यक्रममा व्यस्त छन् । पोखरा वडा १ मा नेपाली कांग्रेसका उम्मेदवारले भने घरदैलो सकेर मतदाता शिक्षामा केन्द्रित हुन थालेका छन् । उनीहरुले बिहीबार पोखरा १, ट्याक्सीचोकबाट मतदाता शिक्षा थालेका हुन् ।

गत वैशाख १४ देखि सुरु घरदैलो कार्यक्रम सकिएपछि मतदाता शिक्षामा केन्द्रित हुन लागेको वडाध्यक्ष पदका उम्मेदवार सीता गुरुङले बताइन् ।

उनी भन्छिन्, अब हाम्रो उद्देश्य भनेको मतदाताले हालेको मत सतप्रतिशत सदुपयोग होस् र खेर नजाओस भन्ने हो । जसका लागि मत राख्ने तरिकासँगै मतदाता शिक्षा कार्यक्रम लिएर मतदाताकामाझ जान्छौं । योसँगै पार्टीका उम्मेदवारका पक्षमा माहोल बनाउन कोणसभा र प्रशिक्षण कार्यक्रम समेत सुरु गर्छौ ।’

उम्मेदवारले घरदैलोमा ‘सास्ती हैन सुविधाका लागि, स्वार्थी हैन इमानदारिताका लागि’ भन्दै आफ्नो वडाका टोलटोलमा प्रत्येक मतदाताको घरदैलोमा पुगि सुझाव संकलन गरेका थिए । चुनावमा वडाध्यक्षमा सीता गुरुङसहित सदस्यमा सुनिता कुँवर नेपाली, पार्वती खनाल पोख्रेल, मेघबहादुर गुरुङ र रामजीप्रसाद पौडेल लडेका छन् ।