पोखरा । नेकपा एमाले उपमहासचिव पृथ्वीसुब्बा गुरुङले नेपालीलाई सुखी राख्ने पार्टी एमालेमात्र हो भनेका छन् ।
एमाले पोखरा वडा कमिटी ८ ले बिहीबार आयोजना गरेको चुनावी भेलालाई सम्बोधन गर्दै उनले परमादेशबाट स्थापित कांग्रेस सरकार ढाल्न र अपवित्र गठबन्धन तहसनहस पार्न एमालेको जीत आवश्यक भएको दाबी गरे ।
‘देश समृद्ध बनाउने एमाले हो । नेपालीलाई सुखी राख्ने एमाले हो । देश बचाउने एमाले हो । त्यसैले एमालेलाई हरेक तहको निर्वाचनमा भोट हाल्नुपर्छ,’ पार्टीका प्रचार विभाग प्रमुख गुरुङले भने, ‘गाउँ समृद्ध बने मात्रै देश समृद्ध बन्ने भएकाले गाउँगाउँको सरकार पनि एमालेकै हुनुपर्छ ।’
पाँचदलीय गठबन्धन एकातिर र सिंगो एमाले एकातिर रहे पनि जनताले राष्ट्रघातविरुद्ध राष्ट्रवाद, असत्य विरुद्ध सत्य, अन्याय विरुद्ध न्यायको तराजुमा जोखेर जनताले एमालेलाई नै भारी मतले जिताउने बताए । ‘यसपटक ६७ प्रतिशत मत एमालेको पक्षमा खस्छ । कम्तीमा ५० प्रतिशत ठाउँ त एमाले एक्लैले जित्छ–जित्छ,’ गुरुङको ठोकुवा छ, ‘यत्ति हो एमालेभित्र एकता हुनुपर्छ । हामीमै एकता हुन जरुरी छ । कांग्रेस छिन्नभिन्न छ । प्रचण्ड र माधव नेपालहरु त मोहनविक्रम सिंह जस्ता हुनेछन् ।’
उनले माधव नेपाल वंशनास गर्ने कसं रहेको आरोपसमेत लगाए भने प्रचण्डको पार्टी विसर्जनतर्फ गइसकेको ठोकुवा गरे ।
उनले भूगोलमा देशकै ठूलो र जनसंख्यामा दोस्रो ठूलो पोखरा महानगरमा अब मेयरमा कृष्ण थापा र उपमेयरमा मञ्जुदेवी गुरुङले जितेपछि विकासको लहर चल्ने बताए । पोखराका ३३ वटै वडा र चारै गाउँपालिकासहित त्यहाँका सबै वडामा एमालेले विजयको झण्डा फहराउने उनको भनाइ थियो ।
एमालेका केन्द्रीय सदस्य एवं कास्की जिल्ला इञ्चार्ज भीम कार्कीले जनताले देशभर एमालेलाई पुनः पहिलो पार्टी बताउने दाबी गरे ।
पोखरामा मेयरका उम्मेदवार कृष्ण थापाले महानगरको घोषणापत्र र वडाहरुको घोषणापत्रमा उल्लेखित योजना अक्षरशः पालना गर्ने बताए । उनले आफू पहिल्यै मेयर भइसकेको र उपमेयरले ५ वर्षदेखि निरन्तर काम गरिरहेकाले पनि आफूहरु जित्नासाथ पोखराको विकासको काम सुरु हुने बताए ।
उपमेयर उम्मेदवार मञ्जुदेवी गुरुङले पोखरा महानगरमा ५ वर्ष भए गरेका कामको फेहरिस्त प्रस्तुत गरिन् । पोखरा ८ मा यसअघि वडाध्यक्ष जितेका रुद्रनाथ बराल पुनः चुनाव लडेका छन् ।
सदस्यमा पवित्रा केसी, लक्ष्मी बिक, गोविन्द बराल र हिराकाजी श्रेष्ठ उम्मेदवार छन् ।