पोखरा, २२ वैशाख । नेकपा एमाले पोखरा १७ ले उम्मेदवारसहितको घरदैलो कार्यक्रमलाई तीव्रता दिएको छ । हालसम्म वडाको प्रगतिटोल, लामातरा, महतगौडा, रातोपैह्रा, घारीपाटन, आँखा अस्पतालचोक, ड्यामसाइड, बिरौटा, राममन्दिर, पावरहाउस क्षेत्रमा घरदैलो भएको चुनाव प्रचारप्रसार समितिले जनाएको छ ।

घरदैलोमा एमाले कार्यकर्ता तथा स्थानीय वासिन्दाको सहभागिताले थप उत्साहित बनाएको एमाले वडा अध्यक्ष ऋषव तिमिलाले बताए ।

घरदैलोमा मत माग्न पुगेका उम्मेदवारलाई मतदाताले विजय भएपछि नभुल्न र समानुपातिक विकास निर्माणसंगै दुखसुखमा साथ दिन अनुरोध गरेका थिए ।

स्थानीय तह निर्वाचनमा नेकपा एमालेले पोखरा १७ मा वडा अध्यक्ष राधिका शाही योगीसहित महिला सदस्यमा विष्णु थापा भुजेल, दलित महिला सदस्यमा तारा सेवा तथा सदस्यमा शिवराम भण्डारी र विक्रम गुरुङलाई उम्मेवार बनाएको छ ।

पोखरा १७ मतदाता हिसाबले महानगरका ३३ वटा वडामध्ये दोस्रो ठूलो हो ।