पोखरा । स्याङ्जाको फेदीखोला गाउँपालिका ४ का सदस्य पदका उम्मेदवार सहनशील पौडेल मंगलबार कास्कीको पुम्दीमा भेटिए । फेदीखोला–४, आरुखर्कका २२ वर्षीय पौडेल आगामी स्थानीय तहको चुनावमा जनता समाजवादी पार्टीका तर्फबाट चुनाव लडेका छन् ।

पुम्दीमा घरदैलोमा सरिक भएकी पार्टी नेता हिसिला यमीलाई भेट्न उनी त्यहाँ आएका थिए ।

आदर्श समाज प्रतिनिधिसँगको भेटमा उनले समाजबाट भ्रष्टाचार अन्त्य गर्न राजनीतिक रुपान्तरणका लागि आफू उम्मेदवार भएको बताए । लियो क्लब पोखरा चौतारीका सचिव उनी समाजवादी विद्यार्थी युनियनका जिल्ला सदस्य हुन् । उनी सिभिल इन्जिनियरिङ अध्ययनरत् छन् ।

बुधबार उनी प्रचारका क्रममा आफ्नो निर्वाचन क्षेत्र फेदीखोला ४, आरुखर्कको गलेम पुगेका छन् ।