पोखरा, २१ वैशाख । नेकपा एमालेबाट मादी गाउँपालिका अध्यक्ष उम्मेद्वार शिवबहादुर गुरुङ (महेन्द्र) ले निर्वाचित भए गाउँपालिकालाई टुरिजम हब बनाउने प्रतिबद्धता जाहेर गरेका छन् ।
बुधबार मादी ५ ठूलास्वाँरामा आयोजित चुनावी सभामा बोल्दै उनले मादीमा पर्यटनको अहिलेभन्दा पनि राम्रो सम्भावना भएको बताए । मादी–५ बयरघारीमा कृत्रिम ताल बनाउनेसहित मादीका गाउँमा पिकनिक स्पोर्ट, बिबिक्यु स्पोट, वाटर–स्पोर्ट, डेजर्ट बाइकजस्ता एडभेन्चर योजना आफूसँग रहेको महेन्द्रले सुनाए । यी गतिविधिले होटल–रेष्टुरेन्ट चलेपछि गाउँमै रोजगारी सिर्जना हुने भएकाले विदेशीने बाध्यता नहुने उनले बताए ।

चुनाव जितेमा मादी नदीमा र्‍याफ्टिङ सञ्चालन गरेर पर्यटकलाई आकर्षित बनाउने उनको प्रतिबद्धता छ । ‘ठूलास्वाँराजस्ता भर्खर होमस्टे सञ्चालन गर्दै गरेको ठाउँ थुप्रै छन् । होमस्टे राम्रो बनाउन तालिम पनि आवश्यक छ । त्यसको लागि तालिम सञ्चालन गर्ने छु,’ उनले भने, ‘मादीका सुन्दर गाउँहरुलाई होमस्टेको रुपमा विकास गर्नेछु ।’

उपाध्यक्ष उम्मेदवार कल्पना गुरुङले एक कार्यकाल गाउँ कार्यपालिका सदस्य हुँदा उत्पीडित समुदायको समस्या देखेको र चुना जितेमा त्यसलाई समाधान गर्न आफू लाग्ने बताइन् ।
मादीमा एमालेबाट प्रमुखमा शिवबहादुर गुरुङ (महेन्द्र) संगै उपप्रमुखमा कल्पना गुरुङ, मादी १ मा उमरबहादुर गुरुङ, २ मा एकजंग गुरुङ, ३ मा ज्यामप्रसाद गुरुङ, ४ मा शिवप्रसाद सापकोटा, ५ मा सुब्बा गुरुङ, ६ मा डिलबहादुर क्षेत्री, ७ मा रामप्रसाद गुरुङ, ८ मा प्रेमबहादुर गुरुङ, ९ मा मनोजकुमार गुरुङ, १० मा रामराज सुवेदी, ११ मा सिंहमान तामाङ र १२ मा प्रकाश बराल एमालेबाट वडाध्यक्षका उम्मेद्वार छन् ।