पोखरा, २१ बैशाख । सत्तारुढ पाँचदलीय गठबन्धनले पोखरा ६ मा चुनावी प्रचार अभियान तथा घरदैलो कार्यक्रमलाई निरन्तरता दिएको छ ।वडाध्यक्षका उम्मेदवार जगतबहादुर पहारीले चुनावी अभियानमा देखिएको उत्साह र सहभागिताले जीत नजिक पुगेको अनुभुति भएको बताए।

पहारीले पर्यटकीय क्षेत्र बैदामको थप विकासका लागि महानगरको प्रमुख, उपप्रमुख र वडामा सबै टिम विजयी हुनुपर्ने आवश्यकता औँल्याए । उनले वडामा बाँकी रहेका अधुरा योजना पूर्णता र बैदामलाई देशकै पर्यटनको केन्द्र बनाउने अभियानमा साथ दिन वडावासीसमक्ष आग्रह गरे।

उम्मेदवारहरु विभिन्न सांस्कृतिक कार्यक्रमसहित घरदैलोमा सहभागी हुँदा स्थानीयवासीले फूलमाला र टीका लगाएर भव्य स्वागत गरेका छन् । डिहीकोपाटन, नहरमार्ग, खहरे, बंगलादीका टोल र भित्री सडकहरुमा समेत बुधबार उम्मेदवारले बिहानदेखि घरदैलो गरेका छन् । गठबन्धनबाट सदस्यमा कृष्णप्रसाद आचार्य, विकास पहारी, पवित्रा थापा र शोभा जलारी चुनावी मैदानमा छन्।