लमजुङ । लमजुङमा नमुना मतदानको अभ्यास गरिएको छ । जिल्ला सदरमुकाम बेंसीसहरमा जिल्ला निर्वाचन कार्यालयको संयोजनमा बदर मत घटाउने तथा मतदाता शिक्षाको व्यावहारिक प्रयोग गर्ने उद्देश्यले नमुना मतदान अभ्यास गराइएको हो । कुल ३० मत खसेकोमध्ये ७ मत बदर भएको थियो ।

उक्त अवसरमा मतदान केन्द्रको समेत नमूना बनाएर मतदातालाई अनुशासित भई लाइनमा बस्न लगाउनेदेखि मतपेटिकामा के कसरी मत खसाल्ने भन्नेसम्मका अभ्यास गराइएको जिल्ला निर्वाचन अधिकृत सिर्जना मिश्रले बताइन् ।

उनकाअनुसार मतगणनासमेत गरिएको थियो । मतदान अधिकृतको दस्तखत छुटेको मतपत्र पाएका मतदाताले व्यक्त गर्न सक्ने असन्तुष्टिको समेत अभ्यास गराइएको थियो ।

कार्यक्रम शुभारम्भको अनुमति दिँदै मुख्य निर्वाचन अधिकृत शिवप्रसाद खनालले सर्वसाधारणलाई मतदानप्रति सचेत गराउने, मतदाता शिक्षा बढाउने उद्देश्यले नमूना अभ्यास कार्यक्रम गरिएको बताए ।

नमना मतदानमा अपांगता भएका व्यक्तिहरूसमेतले भाग लिएको जिल्ला निर्वाचन अधिकृत सिर्जना मिश्रले जानकारी दिइन् । मतदान भएका मतमध्ये अधिकृतको हस्ताक्षर नभएका कारण ७ बदर भएको जिल्ला निर्वाचन कार्यालयका सूचना अधिकारी जीवाखर शर्माले बताए । कार्यक्रममा प्रमुख जिल्ला अधिकारी सुशील वैद्यसहितका कार्यालय प्रमुखहरूको सहभागिता थियो ।