पोखरा । गुप्तेश्वर महादेव बहुमुखी क्याम्पसको आयोजना एवं क्याम्पसमा अध्ययनरत होटेल व्यवस्थापन चौथो सेमेस्टरका विद्यार्थीको व्यवस्थापनमा बृहत् फुड फेस्टिभल भएको छ ।

पोखरा–१७ स्थित क्याम्पस परिसरमा वैशाख १६ र १७ सम्म भएको कार्यक्रममा क्याम्पसस्तरीय खुला नृत्य कार्यक्रम तथा विद्यार्थीका विविध प्रस्तुति राखिएको थियो ।

विद्यार्थीको कला संघीय सांसद विद्या भट्टराई र गण्डकी प्रदेशका अर्थमन्त्री रामजी बरालले अवलोकन गरेका थिए ।

अवलोकनमा सांसद भट्टराईले सामुदायिकस्तरबाट सञ्चालित, विश्वविद्यालय अनुदान आयोगबाट प्रत्यायनकृत (क्युएए प्रमाणित) सो क्याम्पसले होटल व्यवस्थापन र सूचना व्यवस्थापन विषयमा गण्डकी प्रदेशमै नमुना क्याम्पसको रुपमा सञ्चालन गरेको र यस क्याम्पसको स्तरोन्नतिमा संंघीय सरकारबाट आवश्यक पहल गर्ने बताइन् ।

गण्डकी प्रदेशका अर्थमन्त्री बरालले क्याम्पसलाई प्रदेशकै उत्कृष्ट क्याम्पस बनाउन प्रदेश सरकारले पहल गर्ने आवश्यक दिए ।

गुप्तेश्वर महादेव बहुमुखी क्याम्पस सञ्चालक समिति अध्यक्ष प्राडा टंकराज अधिकारी र क्याम्पसको प्रमुख दातृृ संस्था तथा सो कार्यक्रमको मुख्य प्रायोजक गुप्तेश्वर गुफा व्यवस्थापन समितिका अध्यक्ष विष्णुप्रसाद पौडेलको अध्यक्षता भएको कार्यक्रममा क्याम्पस प्रमुख धर्मराज बरालले स्वागत मन्तव्य राखेका थिए । बिएड र बिबिएस प्रथम वर्षका छात्राले स्वागत गान प्रस्तुत गरेका थिए ।

सो अवसरमा बिएचएम तथा बिआइएमका विभिन्न सेमेस्टरका विद्यार्थीले तयार पारेको भोजनका ५वटा स्टल प्रदर्शन गरिएका थिए ।

कार्यक्रम संचालन क्याम्पसका अध्यापकद्वय लालमणि पोख्रेल र मोहन भण्डारीले गरेका थिए ।

क्याम्पसका सहायक क्याम्पस प्रमुख मोहन भण्डारीको संयोजकत्वमा होटल व्यवस्थापनका सहजकर्ता जितेन्द्र थापा र होटल व्यवस्थापन इन्चार्ज आशीष पौडेल सदस्य रहने कार्यक्रम भएको हो ।