पोखरा, २० वैशाख । पोखरा वडा ६ मा नेकपा एमालेले मंगलबार वडामा बृहत् युवा भेला गरेको छ । अबको नेतृत्व युवाको हातमा भन्दै पार्टीले युवा भेला आयोजना गरेको हो।

भेलामा प्रदेश सांसद राजीव पहारीले युवाले राणा शासनको अन्त्य गरेको कुरा स्मरण गर्दै अबको नेतृत्व युवाको हातमा भएको बताए । उनले देश परिवर्तनमा युवाले अबको समयमा भूमिका खेल्नुपर्ने उनको भनाइ थियो ।

कार्यक्रममा एमालेतर्फबाट पोखरा ६ मा वडाध्यक्षका उम्मेदवार विष्णुबहादुर भट्टराईले आफूहरुको जीत निश्चित भए पनि नियम र कानुनले वैशाख ३० कुर्नुपर्ने बताए । उनले महानगरबाट छुट्टाएको १५ प्रतिशत बजेट युवाकै हातबाट वडा निर्माणसँगै वडाको विकासमा खर्चिने उल्लेख गर्दै सक्षम टिमलाई भारी मतले विजयी गराउन आग्रह गरे । उनले कैयौं सहिद देशभक्त युवा एमालेमा रहेको दाबीसमेत गरेका छन् ।

एमाले वडा ६ कमिटी अध्यक्ष बलराम पहारीको अध्यक्षतामा भएको कार्यक्रमको संचालन उमा भण्डारीले गरेकी थिइन्।