पोखरा, २० वैशाख । नेकपा माओवादी केन्द्रका केन्द्रीय सदस्य तथा कास्की इञ्चार्ज राजकाजी गुरुङ (करण) ले जनताको अवस्था बदल्न माओवादीको विकल्प नभएको दाबी गरेका छन्।

नेकपा माओवादी केन्द्रको पोखरा १ मा मंगलबार आयोजित घरदैलो कार्यक्रममा बोल्दै उनले भने, ‘व्यवस्था पनि माओवादीका कारण बदल्यौं, अब जनताको अवस्था बदल्न पनि माओवादीलाई नै भोट दिऔं ।’ माओवादीको जनयुद्धका कारण ब्यवस्था बदलिएको र अब अवस्था बदल्नपनि माओवादीलाई नै भोट दिनुपर्ने उनको भनाइ थियो।

माओवादीबाट पोखरा १ मा वडाध्यक्षका उम्मेदवार भानुभक्त अधिकारीले वडावासीलाई स्थानीय सरकारले अनुभूति गराउने बताए । चुनावी घरदैलोका क्रममा उनले विजयी भएपछि वडाको सेवालाई जनमैत्री बनाइने प्रतिवद्धता जनाउँदै मत मागे।

वडालाई स्मार्ट वाडको रुपमा विकास गर्न र समृद्ध वडा बनाउने अभियानमा माओवादी (केन्द्र)को विकल्प नरहेकामा जोड दिए ।
माओवादी केन्द्रले सो वडामा अध्यक्षमा अधिकारीसहित महिला सदस्यमा मीना कोइराला, दलित महिला सदस्य कल्पना दमाईं, खुला सदस्य रुद्रप्रसाद लुइटेल र धनबहादुर तामाङलाई उम्मेदवार बनाएको छ।