पोखरा, २० वैशाख । सत्तारुढ पाँचदलीय गठबन्धनले पोखराको मुख्य पर्यटकीय क्षेत्र बैदाममा घरदैलो अभियानलाई निरन्तरता दिएको छ । गठबन्धनबाट पोखरा–६ का उम्मेदवार मतदाताको घरघरमा पुगेर मत मागिरहेका छन् । गठबन्धनको चुनावी घोषणपत्रले यस क्षेत्रको विकास हुनेमा मतदातासमेत आशावादी छन् ।

विभिन्न सांस्कृतिक कार्यक्रमसहित उम्मेदवार घरदैलोमा सहभागी हुँदा स्थानीयवासीले भव्य स्वागत गर्ने गरेका छन् । मंगलबार जरेवर, बुलौँदी, ठाडापसल, गैरीखेत, दृष्टिमार्ग, मुलथोक, गौरीघाट, अम्बोट हुँदै बगैँचासम्म घरदैलो गरिएको कांग्रेस वडा इकाइ समितिका सहसचिव शंकर पहारीले जानकारी दिए ।

निवर्तमान वडाध्यक्ष जगतबहादुर पहारीले गठबन्धनका कांग्रेसतर्फबाट पुनः चुनाव लडेका हुन् । सदस्यमा नेकपा माओवादीका तर्फबाट कृष्णप्रसाद आचार्य, खुल्ला सदस्यमा नेपाल कम्युनिष्ट पार्टी (एकिकृत समाजवादी) तर्फबाट विकास पहारी र महिला सदस्यमा कांग्रेसका तर्फबाट पवित्रा थापा र दलित महिला सदस्यका कांग्रेसकी शोभा जलारी चुनावी मैदानमा छन् ।

वडाध्यक्षका प्रत्याशी पहारीले पर्यटकीय क्षेत्र बैदामको थप विकासका लागि गठबन्धनको जीत सुनिश्चित रहेको बताए।