हेमजा । नेपाली कांगेस अन्नपूर्ण गाउँपालिका अध्यक्षका उम्मेदवार युवराज कुँवरले लोकतन्त्र बचाउन स्थानीय तह निर्वाचनमा कांग्रेसले जित्नुपर्ने बताएका छन् ।

नागडाँडामा वडा १ सम्पर्क पार्टी कार्यालयको उद्घाटन गर्दै उनले नेपालमा वास्तविक लोकतन्त्रको पक्षधर पार्टी कांग्रेस मात्रै भएको दाबी पनि गरे ।

उनले अबको चुनाव कांग्रेसले नजिते धेरै प्रश्नको सामाना गर्नुपर्ने भनाइ राख्दै जनचाहनाअनुसार आफूले कार्य गरेको र आगामी दिनमा पनि गर्ने प्रतिबद्धता जनाए । नसक्ने कामको जनतालाई आश्वासन दिने होइन भन्दै उनले जनताले कांग्रेसप्रति देखाएको भरोसालाई आफूले टुट्न नदिने बचनबद्धता समेत प्रकट गरे ।

उपाध्यक्षकी उम्मेदवार खिमकुमारी गुरुङले कांग्रेस प्रजातन्त्रमा विश्वास राख्ने पार्टी भएको उल्लेख गर्दै यसपटक सम्पूर्ण वडामा जीत हुने विश्वास जनाइन् । पालिका सभापति मनपति भण्डारीले कांग्रेसले अगाडि सारेको टिम जुझारु भएको स्पष्ट पार्दै विगतमा जस्तै यसपटक पनि अन्नपूर्णमा कांग्रेसले बाजी मार्ने उल्लेख गरे।

वडाध्यक्ष उम्मेदवार इन्द्रप्रसाद सुवेदीले वडाको समग्र विकासमा आफू नेतृत्वको टिम प्रतिबद्ध रहेको उल्लेख गर्दै जनताले अधिक मत दिने विश्वास व्यक्त गरे । कार्यक्रममा अन्नपूर्ण १ का वडाध्यक्ष भरतजंग कँुवर, पार्टीका वडासचिव नरपति दाहाल, तरुण दलका दिल जिसी, वडा उपसभापति चेतभक्त लम्साल दाहाल, वडा सदस्यका उमेदवार लगायतले पनि बोलेका थिए ।