पोखरा । सूर्यबहादुर केसी स्मृति सहारा फुटवल एकेडेमीमा रहेका ८ जना किशोरहरुलाई बिदाइ गरिएको छ । प्लस टु सकेका ८ जना किशोरहरुलाई क्लबले आइतबार बिदाइ गरेको हो ।

करिब ९ वर्ष एकेडेमीमा रहेर फुटबलसहित उच्च शिक्षा हासिल गरेका पोखरा १० का सन्दिप केसी, पर्वत कार्किनेटा ६ का शिशिर क्षत्री, रुकुम कोल २ का कुशल बुढामगर, कास्की कृष्ति २ का निश्चल भण्डारी, चितवनका प्रमिश गुरुङ, सुर्खेत वीरेन्द्रनगरका कमल सोमै मगर, स्याङजा बाहकोट १ का सन्देश गुरुङ र स्याङ्जा पन्चमुल ४ निरज बिकलाई क्लबले बिदाइ गरेको हो । क्लबका सस्थापक अध्यक्ष वसन्त थकाली, मानार्थ सदस्य महेश गुरुङ, क्लबका अध्यक्ष हरिराम गुरुङ (सुरज), निवर्तमान अध्यक्ष केशव थापा, पूर्वअध्यक्ष विक्रम थकाली र वीरभद्र आचार्य लगायतले खेलाडीहरुलाई खादासहित मायाको चिनो प्रदान गर्दै बिदाइ गर्नु भएको हो ।

एकेडेमीमा तेस्रो ब्याजकारुपमा १६ जिल्लाका २८ जना बालकहरु रहे पनि हाल १५ जना रहेको सहारा क्लबका महासचिव रामजीप्रसाद अधिकारीले बरालले बताए ।

२०५५ भदौ ३० गते सहारा क्लबको स्थापना भएको हो । २०५८ सालमा क्याराभान गोल्डकप सुरु भएसँगै सहारा एकेडेमी सुरु भएको थियो । कार्यक्रममा बोल्दै संस्थापक अध्यक्ष थकालीले जहाँ गरिब र विपन्न वर्गका मानिस छन् उनीहरुको हकहितमा बोल्दै आफुले सकेको सहयोग गर्न एकेडेमीका किशोरहरुलाई सुझाव दिए । क्लबका मानार्थ सदस्य महेश गुरुङले क्लबले हुर्काएका किशोरहरु जहाँ भए पनि क्लबप्रति आफ्नो भूमिका खेल्न सक्नुपर्ने बताए ।

एकेडेमीबाट बिदाइ हुँदै गर्दा सुर्खेतका कमल सोमैमगर भावुक हुँदै आफ्नो वाल्यकालको महत्वपूर्ण जीवनमा एकेडेमीले आमा बाबुको माया दिएकोले आफू जहाँ भए पनि एकेडेमीप्रति चासो दिने बताए ।

क्लवका अध्यक्ष हरिराम गुरुङ (सुरज) को अध्यक्षतामा सम्पन्न कार्यक्रममा वरिष्ठ उपाध्यक्ष केशवराज बराल, उपाध्यक्ष चित्रबहादुर पुन, मानार्थ सदस्य महेश गुरुङ, सहारा युकेका सल्लाहकारहरु शेरा गुरुङ र भोजबहादुर गुरुङ, रामबजार सोसाइटी युकेका पूर्व अध्यक्ष रुपक गुरुङ, नेपाल खेलकुद पत्रकार मञ्च गण्डकीका अध्यक्ष दीननाथ बराल लगायतले बोलेका थिए ।

सहारा क्लबद्वारा सञ्चालित सहारा एकेडेमीलाई पोखराको व्यावसायिक घराना सूर्यबहादुर केसी परिवारले वार्षिक १५ लाखका दरले १० वर्ष सहयोग गर्ने भएको छ । एकेडेमीको जिम्मेवारी लिएसँगै सहारा क्लब एकेडेमीको नाम समेत परिवर्तन भएको क्लबले जनाएको छ ।