पोखरा । पोखरा २७ को वडाअध्यक्षमा पूर्णकुमार गुरुङले आफ्नो कार्यकाल फेरि दोहोर्‍याउन चाहेका छन् । ५ वर्षे कार्यकालको समीक्षा गर्दै उनले आफूले वडा नं २७ को विकासमा कुनै कसुर बाँकी नराखेको बताए ।

उनले पोखरा २७ मा बाटो पिच गर्ने काम करिब ९० प्रतिशत बढी भएको बताए । वडामा आफू आएपछि हाल रहेको वडा कार्यालयमा महानगरको कोभिड अस्पताल सञ्चालन गर्न दिइएको र हाल भाडामा वडा कार्यालय सञ्चालनमा रहेको बताए । आगामी ५ वर्षमा वडा कार्यालय भवन निर्माण गर्नेलगायत अन्य विकास निर्माणका काम गर्ने उल्लेख गरे ।

तालचोक देखि बेगनासतालसम्मको बाटो निर्माण आफ्नो प्राथमिकता रहेको र त्यसबारे महानगरमा निरन्तर दबाब दिँदै आएको समेत बताए । आगामी ५ वर्षमा साबिक लेखनाथको मुख्य बजार रहेको तालचोक र अघौं चोकलाई व्यापारिक हब बनाउने र कवि शिरोमणि लेखनाथ पौड्यालको जन्मस्थललाई पर्यटकीय आकर्षण केन्द्रको रुपमा विकास गर्दै लैजानेमा जोड दिए ।

नेकपा माओवादी केन्द्र र नेकपा समाजवादी पार्टीसँग गठबन्धन गर्दै सहकार्य र समझदारीमा आफूले चुनाव जिते पनि एमाले पार्टीसँग सल्लाह गर्दै एकीकृत विकासका योजना आफूसँग रहेको गुरुङले बताए ।