पोखरा । कस्केली अधिकृत समाजले नयाँ वर्ष–२०७९ को क्यालेन्डर लोकार्पण एवं शुभकामना आदानप्रदान कार्यक्रम गरेको छ ।

समाजका अध्यक्ष चन्द्रबहादुर सुवेदी, सल्लाहकार दुर्गाबहादुर शाह बाबा, प्रेमप्रकाश गौतम, विष्णुप्रसाद बराल, विश्वनाथ पराजुली, कर्मचारी मिलन केन्द्रका अध्यक्ष केदार बराल लगायतले क्यालेन्डरको सामूहिक रुपमा लोकार्पण गरे । क्यालेन्डरमा पोखराको मौलिकता झल्कने किसिमका तस्बिरसमेत उल्लेख छ ।

समाजका अध्यक्ष सुवेदीले नयाँ वर्षले सबैमा सुख शान्ति र समृद्धि ल्याउने विश्वास व्यक्त गरे । विभिन्न रचनात्मक कार्यक्रमका साथ समाजका गतिविधि अघि बढाउने बताउँदै उनले त्यसका लागि सबैको साथ र सहयोग आवश्यक हुने बताए ।
समाजका निवर्तमान अध्यक्ष एवं सल्लाहकार दुर्गाबहादुर शाह बाबाले नयाँ वर्षले प्रत्येक नेपालीमा सुख शान्ति ल्याउने र महामारीजन्य प्रकोप अन्त्य हुने विश्वास व्यक्त गरे ।

कार्यक्रममा सल्लाहकार कृष्णकान्त सिग्देल, डा.दीर्घनाथ ढुंगाना, भगवान् पन्त, प्रेमप्रकाश गौतम, विष्णुप्रसाद बराल, विश्वनाथ पराजुली, डा. कालु शर्मा लगायतले बोलेका थिए ।

कार्यक्रममा समाजका उपाध्यक्ष लोकनाथ दवाडीले स्वागत र सचिव महेश पौडेलले सञ्चालन गरेका थिए । उक्त अवसरमा जिल्ला समन्वय अधिकारी नवराज बराल र रुपा गाउँपालिकाका शाखा अधिकृत लोकनाथ पौडेललाई समाजको आजीवन सदस्यता प्रदान गरिएको थियो ।