पोखरा । स्याङ्जाको बिरुवा गाउँपालिकामा नेपाली कांग्रेसबाट अध्यक्षका उम्मेदवार डोलराज (डिआर) पोखरेलले आफ्नो प्रतिबद्धता सार्वजनिक गरेका छन् । समृद्ध बिरुवा बनाउन उनले ‘८ ब’ मा आधारित प्रतिबद्धतापत्र बनाएका हुन् ।

उनले ‘कृषि, पर्यटन, सडक पूर्वाधार, सम्बृद्ध बिरुवा निर्माणको आधार’ र ‘आफ्नो लागि सबैले गर्छन्, अरुका लागि केही गरौं’ नारा पनि अघि सारेका छन् । ‘८ ब’ मा बाह्रैमहिना चल्ने सडक, व्यवसायमा युवा, बौद्धिक विकास र विशिष्ट व्यवहार, उत्पादनमा वृद्धि छन् । यस्तै व्यावसायिक शिक्षा, वन र वातावरण, बहस र पैरवी, बगैंचा अभियानलाई प्रतिबद्धतापत्रमा समेटिएको छ ।

चुनाव जिते प्रतिवद्धता पूरा गर्ने भन्दै उनले बिरुवाबासीको चाहना र इच्छाअनुुसार विकास निर्माणका कामलाई पनि प्राथमिकतामा राखेर अघि बढ्ने बताए । बिरुवामा कांग्रेससहित गठबन्धनको चुनावी तालमेल छ । जसअनुसार अध्यक्षमा कांग्रेसबाट पोखरेल र उपाध्यक्षमा माओवादी केन्द्रका थमन गुरुङ उम्मेदवार छन् ।

२०७४ को निर्वाचनमा नेकपा एमालेका चुनप्रसाद शर्मा अध्यक्षमा निर्वाचित भएका थिए । उनले कांग्रेसका चौबहादुर गुरुङलाई १ हजार ५३ मतले पराजित गरेका थिए । शर्माले ४ हजार ४ सय ३ मत ल्याउँदा गुरुङले ३ हजार ३ सय ५० मत ल्याए ।

अध्यक्षका उम्मेदवार पोखरेल अबको विकल्प कांग्रेसमात्र भएको भन्दै आफूले चुनाव जित्नेमा विश्वस्त छन् । विभिन्न सामाजिक संघसंस्थामा समेत आबद्ध पोखरेल पत्रकार महासंघ कास्कीमा पूर्व कोषाध्यक्ष भइ काम गरेका थिए ।