पोखरा । शिवशिखर बहुउद्देश्यीय सहकारी संस्थाद्वारा सञ्चालित गार्डेन मार्ट डिपार्टमेन्ट स्टोरको १७ औं शाखा पोखराको चाउथेमा शनिबार शुभारम्भ भएको छ ।

मातातीर्थ औंसी अवसरमा पोखरा उद्योग वाणिज्य संघका प्रथम वरिष्ठ उपाध्यक्ष पवन प्रजापतिले डिपार्टमेन्ट स्टोर उद्घाटन गरे । भक्तपुरमा मुख्यकार्यालय रहेको यस सहकारीले देशको ३९ जिल्लामा आफ्नो कार्यक्षेत्र विस्तार गरेको छ ।

कार्यक्रममा प्रजापतिले युवालाई स्वदेशमै रोजगारी प्रदान गर्न महत्वपूर्ण भूमिका खेलेको भन्दै खुसी व्यक्त गरे ।

शिवशिखर बहुउद्देश्यीय सहकारी अध्यक्ष सुशील बानियाँले ५ वर्षभित्रमा ५ सय डिपार्टमेन्टल स्टोर्स देशभरी खोल्ने र युवालाई प्रमुख प्राथमिकताका साथ रोजगारी दिने दाबी गरे । उनले भने, ‘अहिले पनि यस सहकारीले ७ सय बढी युवालाई स्वदेशमा नै रोजगारीको व्यवस्था गरेको छ भने सर्वसाधारण जनतालाई सुपथ र सुलभ तरिकाले दैनिक आवश्यक सामग्री उपलब्ध गराउँदै आइरहेको छ ।’

सो अवसरमा कास्की ज्येष्ठ नागरिक ११२ वर्षीया गौरी आचार्यलाई सम्मान गरिएको थियो । उनको जन्म १९६६ चैतमा कास्कीको धितालमा भएको हो । कार्यक्रममा डिपार्टमेन्टल स्टोर्स कर्मचारी सुशीला न्यौपानेले स्वागत मन्तव्य व्यक्त गरेकी थिइन् ।