पोखरा । नेकपा एमाले स्थायी कमिटी सदस्य तथा संगठन विभाग प्रमुख खगराज अधिकारीले गठबन्धन वैशाख ३० गते समाप्त हुने दाबी गरेका छन् ।

एमाले पोखरा १० को चुनाव प्रचारप्रसार समिति कार्यालय बुधबार उद्घाटन गर्दै नेता अधिकारीले गठबन्धनको आयु वैशाख ३० मा सकिने बताएका हुन् ।

केही दल गठबन्धन बनेर एमालेलाई हराउने प्रपञ्चमा लागेको टिप्पणी गर्दै उनले गठबन्धन आफंैमा मिल्न नसकेको र चुनावपछि गठबन्धनको अस्तित्व समाप्त भएर बताए ।

एमाले सरकारको पालामा जत्तिको विकास कुनै पनि सरकारले गर्न नसकेको दाबी गर्दै उनले आसन्न चुनावमा एमालेको विकासलाई नै प्रचार गरेर अगाडि बढ्नुपर्ने बताए । एमालेको सरकारको पालोमा पोखरा विमानस्थल, सडक निर्माण र नागरिकलाई स्वास्थ्य बीमा जस्ता कार्यक्रम ल्याएको भए तापनि गठबन्धनको सरकारले विकासको कामतर्फ नभइ स्वास्थ्य बिमा कार्यक्रमलाई नै रोक्नतर्फ लागि परेकाले उनीहरुको भण्डाफोर गर्दै चुनावी प्रचार प्रसारमा लाग्न आवश्यक रहेको उनको भनाइ रहेको थियो ।

एमाले पोखरा १० कमिटी तथा निर्वाचन परिचालन कमिटी संयोजक सूर्य बानियाँको अध्यक्षतामा सम्पन्न कार्यक्रममा कमिटी उपाध्यक्ष तथा निर्वाचन परिचालन कमिटिका सहसंयोजक सीता तिमिल्सिनाले स्वागत र वडाध्यक्ष उम्मेदवार पवित्रादेवी गुरुङले आफ्नो चुनावी एजेन्डा प्रस्तुत गरेकी थिइन् । कार्यक्रम सञ्चालन कमिटी सचिव तथा प्रचारप्रसार संयोजक राजु श्रेष्ठले गरेका थिए ।