पोखरा । अन्नपूर्ण केवलकार पोखरा प्रालिले केवलकार चढ्ने यात्रु लक्षित गरी सटल बस सञ्चालनमा ल्याएको छ । निशुल्क सञ्चालन गरिएको सो बस सेवा बिहान साढे ४ देखि साँझ ४ बजेसम्म सञ्चालन गरिने कम्पनीले जनाएको छ ।

सूर्याेदय अवलोकन गर्ने यात्रुका लागि बिहान साढे ४ बजेबाट लेकसाइड फिस्टेल गेटदेखि नै बस सञ्चालन गर्न लागिएको महाप्रबन्धक दिनेश पौड्यालले जानकारी दिए । केवलकारले जारी गरेको तालिकाअनुसार सूर्योदयका लागि लेकसाइडका विभिन्न स्थान हुँदै गाडी केवलकारको बटम स्टेसन पुग्नेछ ।

सूर्योदय अवलोकनपछि यात्रुलाई सेवा दिएपछि उक्त सटल बस पुनः ८ बजेर ३० मिनेटबाट साँझ ४ बजेसम्म सुचारु गरिने छ ।

बिहानी तथा दिउँसो पनि पोखराका विभिन्न स्थानबाट यात्रुलाई सेवा दिइने प्रशासक प्रमुख अरुण कोइरालाले जानकारी दिए ।

गत फागुन ६ देखि सेवा सञ्चालनमा ल्याएको केवलकारले आन्तरिक तथा बाह्य पर्यटकका लागि सूर्योदय र सूर्यास्त अवलोकनको लागि भरपूर उपयोगी हुने कम्पनीको दाबी छ ।

सेदीबगरबाट सराङकोटसम्म साढे २ किमी यात्रा १० मिनेटमा नै तय गर्न सकिनेछ । नेपाली यात्रुका लागि विभिन्न छुट दिंदै आएको केवलकारले विद्यार्थी र ज्येष्ठ नागरिकका लागि २५ प्रतिशत, शारीरिक तथा बौद्धिक अपांगता भएकालाई ५० प्रतिशत छुटको व्यवस्था गरेको छ ।

यसैगरी, ऋण तथा बचत सहकारीका पदाधिकारी एवं कर्मचारीलाई १० प्रतिशत र बुद्ध तथा यति एयरबाट काठमाडौं–पोखरा यात्रा गर्ने यात्रुलाई बोर्डिङ पास आधारमा १२ प्रतिशत छुटको व्यवस्था गरेको छ ।