पोखरा । पोखराको सुनसान सहिदचोक क्षेत्र सोमबार दिउँसो मध्यान्हपछि एकाएक गर्मायो । एकपछि अर्को ब्यानर, झण्डा, पर्चा, बाजागाजासहित नाराबाजीले मानिसको मनस्थिति छिनछिनमा परिवर्तन गर्दथ्यो । फूलमालाले छप्पकै सजिएका उम्मेदवार अघि लगाएर कार्यकर्ताले तामझामका लागि मुख्य निर्वाचन अधिकृतको कार्यालय प्रवेश गर्थे । यसखालको मानिसको हुल कतिबेला रत्नचोकदेखि आउँथ्यो भने कतिबेला मुस्ताङचोकदेखि ।

५ वर्षपछि घुमिफिरी नेपालीको घरदैलो छिरेको स्थानीय तह निर्वाचनको मनोनयनको दोस्रो दिन देशका अन्य पालिकामा झैं सबैभन्दा ठूलो महानगर पोखरामा पनि चुनावी झल्को दिने यसखालको दृश्य देखिनु स्वभाविकै थियो । आगामी ३० वैशाखमा हुने मतदानको लागि निर्वाचन आयोगले २ दिनसम्म उम्मेदवारी दर्ताको समय दिएको थियो । पहिलो दिन पोखराको मेयरमा ११ जनासहितको उम्मेदवारी परेकोमा दोस्रो दिन पनि उत्तिकै संख्यामा मनोनयन परेको छ ।

अघिल्लो दिन साना तथा स्वतन्त्रसहितका उम्मेदवारले उम्मेदवारी दिएकोमा सोमबार नेकपा एमाले, कांग्रेससहितको गठबन्धन, राप्रपालगायत साना एवं स्वतन्त्रले मेयर, उपमेयर, वडाध्यक्ष र सदस्यमा मनोनयन दिएका हुन् ।

पञ्चेबाजासहित सुरू राजनीतिक दलहरुको दलबल नाराजुलुसका साथ मुख्य निर्वाचन अधिकृतको कार्यालय पुगेको थियो । दलबलसहित पुगेका उम्मेदवार बाजागाजा प्रवेशद्वारमै छाडेर उम्मेदवारी दिन कार्यालय छिरेका थिए ।

दिउँसो करिब २ बजेतिर राप्रपाका उम्मदवार मनोनयनका लागि पञ्चेबाजासहित देखा परे । कार्यकर्ताले घेरिएका थिए मेयर उम्मेदवार शंकर खराल र उपमेयरका उम्मेदवार रञ्जना सेन पौडेल (रञ्जु) । राप्रपा कार्यकर्ताले भने गणतन्त्रविरुद्ध नै चर्का नाराबाजी लगाएका थिए । ‘गणतन्त्र मुर्दावाद’, ‘राजा आउ, देश बचाउ’ लगायतका नाराबाजी गर्दै उनीहरुले हिन्दु राष्ट्र नेपाल कायम गर्न राप्रपाको जीत आवश्यक रहेको बताएका थिए ।

त्यसको केही समयपछि अर्को ठूलो दल नेकपा एमाले देखा पर्‍यो । पार्टी कार्यालयबाट र्‍यालीसहित मेयर र उपमेयरलाई अघि लगाएर सिर्जनाचोक, रत्नचोकहुँदै एमालेबाट पोखराको मेयर उम्मेदवार कृष्ण थापा र उपमेयर मञ्जुदेवी गुरुङ सँगसँगै देखा परे ।

एमालेपछि सत्तासीन गठबन्धनबाट मेयर उम्मेदवार धनराज आचार्य माओवादी केन्द्र र कांग्रेसका नेता दायाँबायाँ राखेर मनोनयनका लागि अघि बढे । सँगसँगै कांग्रेसकी कोपिला रानाभाट थिइन् । अन्तिम समयमा उपमेयरको टिकट टुंगाएको कांग्रेसले उनको समर्थनमा नाराबाजी गरेको थियो ।

साँझ ५ बजेसम्म मनोनयनको समयसीमा रहेकोमा कार्यालयभित्र प्रवेश गरेकाले रातिसम्मै मनोनयन गरेका थिए । कार्यालयले उम्मेदवार, प्रस्तावक र समर्थनको विभिन्न कागजातसहित आयोगको मतदाता नामावलीअनुसार फोटोसहितको विवरण अनिवार्य गरेकोमा केहीले छुटाएपछि उम्मेदवार घण्टौंसम्म मनोनयनको पालो कुर्न बाध्य थिए ।

केन्द्रको गठबन्धनसहित अघि बढेको भनिए पनि पोखरामा कांगे्रेसभित्रै असन्तुष्टी झल्कियो । मेयरका लागि वागी उम्मेदवार एकपछि अर्को देखिए । कांग्रेसका नेता नन्दप्रसाद तिवारी, ऋषि सापकोटाले वागी उम्मेदवारी दिए । यसअघि आइतबार कांग्रेसकै विमलबहादुर कार्कीले स्वतन्त्र उम्मेदवारी दिएका थिए । एमालेमा पनि दीपक पौडेलको नाम टुंगाएको सचिवालयले मनोनयनको अघिल्लो रातमात्रै पूर्व मेयरको अनुभव हासिल गरेका प्रदेश सांसद कृष्ण थापालाई टिकट दिएपछि केही कार्यकर्तामा भने प्रष्टैसँगै असन्तुष्टी झल्किन्थ्यो ।

यसबाहेक साना दल तथा स्वतन्त्र उम्मेदवारले शुभचिन्तकको साथमा मनोनयनका लागि आएका थिए । तीमध्ये केहीले भजनकीर्तन गर्नुका साथै पञ्चेबाजाको तालमा नाचेर रमाइलो गरे । केही कार्यकर्ता सेल्फी खिच्न र टिकटक बनाउनै व्यस्त रहेको पाइयो । निर्वाचन आचारसंहिताको अनुगमन गर्न आएका इन्सेक गण्डकी संयोजक शिव खकुरेलले अधिकांश दलले आचारसंहिता उल्लंघन गरेको टिप्पणी गरे ।