पोखरा ।  नेपाली कांग्रेसले आफ्नो भागमा परेका महानगरमा मेयरको उम्मेदवार टुंगो लगाएको छ। पार्टी सभापति शेरबहादुर देउवाले उम्मेदवारी मनोनयनको अन्तिम दिन आज उम्मेदवार छानेका हुन्।

काठमाडौंको मेयरमा सिर्जना सिंह, ललितपुरमा चिरिबाबु महर्जन र विराटनगरमा नागेश कोइरालालाई उम्मेदवार बनाउने निर्णय कांग्रेसले गरेको हो।

हिजो बसेको कांग्रेस संसदीय समितिको बैठकले उम्मेदवार छान्ने जिम्मा सभापति एवं प्रधानमन्त्री शेरबहादुर देउवालाई दिएको थियो। सभापति देउवाले नेताहरूसँगको परामर्शमा आज उम्मेदवारको टुंगो लगाएका हुन्।

काठमाडौंमा सिर्जना सिंहका लागि लगभग सहमति भइसकेको भए पनि विराटनगरमा विवाद थियो। अन्ततः सभापति देउवाले शेखर कोइरालाले जोडबल गरेका नागेश कोइरालालाई टिकट दिएका छन्। देउवाको चाहना अमृत अर्याल वा डिला संग्रौलालाई टिकट दिने थियो।

यता ललितपुरमा चिरिबाबु महर्जनले पुनः अवसर पाएका छन्। ललितपुर र विराटनगरमा ०७४ को चुनावमा कांग्रेसले एक्लै चुनाव जितेको थियो।