पोखरा, १२ वैशाख । एमाले पार्टी सचिवालयले बैठकले पोखराको मेयरमा अघिल्लो दिन दीपक पौडेलको नाम टुंगाएकोमा उनी सुनचोरीको काण्डमा विवादित बनेपछि कृष्ण थापाको भाग्य खुलेको छ । प्रदेश सांसदबाट राजीनामा दिएर मेयर लड्दै गरेका कृष्ण थापा आखिर को हुन् त ?

२०१६ साल चैत १६ मा पोखराको बाटुलेचौरमा जन्मिएका थाप २०५४ सालमा तत्कालीन पोखरा उपमहानगरपालिकाको मेयर थिए । बुवा खिमबहादुर थापा र आमा सुकमाया गुरुङ थापाका सुपुत्र कृष्णका श्रीमती डिकी छिरिङ र छोरा प्रतीक छन् । उनले चिकित्साशास्त्र विज्ञान संस्थान, सुर्खेतबाट सिएमए गरेका छन् । एमाले कास्कीका पूर्व अध्यक्ष उनी प्रदेशसभा चुनावमा कास्की क्षेत्र २ (क) बाट निर्वाचित भएका थिए ।

२०४१ सालमा कम्युनिस्ट पार्टीको सदस्यता लिएका थापाले आफ्नो पूरै जीवन राजनीतिमै बिताएका छन् । २०३५–०३६ सालको विद्यार्थी आन्दोलनबाट उनी राजनीतितर्फ तानिएका थिए । २०३७ सालमा अनेरास्ववियु पृथ्वीनारायण क्याम्पस कमिटीको सदस्य भएपछि उनको राजनीतिक यात्रा सुरु भएको हो । २०३९ देखि १ वर्ष चिकित्सा शास्त्र अध्ययन संस्थान, सुर्खेतको स्ववियु सहसचिव बने ।

२०४० सालमा अखिल नेपाल चिकित्सा सहायक संघको संस्थापक सचिव भएका उनी ०४१ सालमा पृथ्वीनारायण क्याम्पस स्ववियुमा सदस्य निर्वाचित भएका थिए । २०४१ साल २९ भदौमा तत्कालीन नेकपा (माले) बाट कम्युनिस्ट पार्टीको सदस्यता लिए । सोही वर्ष अनेरास्ववियु कास्कीको छैटौं जिल्ला कमिटीको अधिवेशनबाट जिल्ला कमिटी अध्यक्ष निर्वाचित भए ।
२०४३ सालमा जनपक्षीय चुनाव परिचालन कमिटी संयोजक उनै थापा तत्कालीन पञ्चायत राजकाज मुद्दामा २०४३ देखि ०४६ सम्म जेलजीवनको अनुभव सँगाले ।

यस्तै, जनआन्दोलन २०४६ मा वाममोर्चा गण्डकीको सदस्य भए । २०४६ सालदेखि २ वर्ष अनेरास्ववियु केन्द्रीय कमिटी सदस्य बने । २०४९ सालमा नेकपा एमाले जिल्ला कमिटी कास्कीको सचिवालय सदस्य बनेका उनी २०५२ सालमा नेकपा एमालेको प्रथम नगर अधिवेशनबाट सचिव निर्वाचित भएका थिए । त्यसको २ वर्षपछि भएको चुनावमा उनी तत्कालीन पोखरा उपमहानगरपालिकाको मेयर भए ।

२०६५ सालमा नेकपा एमाले कास्कीको सचिव भएका थापा २०७० मा नवौं कास्की जिल्ला कमिटीको अधिवेशनबाट अध्यक्ष निर्वाचित भए । २०५१ सालमा उपत्यका नगर विकासको अध्यक्ष, २०७१ मा राष्ट्रिय ताल समिति सदस्य बनेका उनी २०५५–०७३ सम्म नेपाल नगरपालिका संघको केन्द्रीय सचिवालय सदस्य बने ।