पोखरा । नेपाल खेलकुद पत्रकार मञ्च गण्डकीको आयोजनामा छैटौं संस्करणको ’पोखरा स्पोर्टस् अवार्ड २०७८’ आगामी असार पहिलो हप्ता हुने भएको छ । खेलकुद पत्रकार मञ्च गण्डकीले नयाँ नेतृत्व पाएपछि बसेको दोस्रो बैठकबाट पोखरा स्पोर्टस् अवार्ड २०७८ आगामी असार पहिलो हप्ता गर्ने निर्णयसहित तयारी सुरु गरिएको मञ्चका महासचिव राजाराम पौडेलले जानकारी दिए ।

अवार्ड कार्यक्रमलाई सफल बनाउन सबैको साथ सहयोग आवश्यक रहेको अध्यक्ष दीनानाथ बरालको भनाइ छ । ’हामीले छैटौं संस्करणको पोखरा स्पोर्टस् अवार्डलाई उत्कृष्ट बनाउन तयारी सुरु गरेका छौ, सबैको साथले कार्यक्रम भव्य बन्ने विश्वास छ’ बरालले भने ।

मञ्चले लाइफटाइम अचिभमेन्ट अवार्ड, वर्ष खेलाडी पुरुष, वर्ष खेलाडी महिला, उदीयमान खेलाडी, उत्कृष्ट प्रशिक्षक, उत्कृष्ट खेल संघ र उत्कृष्ट खेल पत्रकारलाई अवार्ड वितरण गर्ने अध्यक्ष बरालले बताए ।

मञ्चको दोस्रो बैठकबाट आगामी जेठमा हुने तय भएको नवौं राष्ट्रिय खेलकुद प्रतियोगिता लक्षित राष्ट्रिय स्तरको बृहत छलफल कार्यक्रम गर्ने निर्णयसमेत भएको छ । छलफल कार्यक्रम जेठ पहिलो हप्ता हुनेछ । यसैगरी दोस्रो बैठकबाटै मञ्चले पूर्व अध्यक्ष विनोद लामिछानेलाई मञ्चको सल्लाहकार चयन गरेको छ ।