पोखरा । पोखरा–१७, बिरौटास्थित राम मन्दिरको सभाकक्षमा दुई दिवसीय श्रीमद्भागवत् ज्ञान महायज्ञको आयोजना गरिएको छ ।

पिताद्वय यज्ञप्रसाद बराल र सावित्रीमोहन भट्टराईको स्मृतिमा पोखरा–१७ बिरौटा निवासी यदुप्रसाद बराल र उनकी पत्नी शान्ति भट्टराई बराल तथा रविप्रसाद बराल र उनकी पत्नी सरीता बरालले पितृ उद्धारार्थ महायज्ञ आयोजना गरेका हुन् ।
महायज्ञमा ब्रह्मकुमारी ईश्वरीय विश्वविद्यालय पार्दी शाखाकी सञ्चालिका राजयोगिनी ब्रह्मकुमारी अप्सराको प्रवचन रहेको छ ।

प्रथम दिनको कार्यक्रममा शनिबार समाजसेवी र धार्मिक व्यक्तित्वको रुपमा परिचित यज्ञप्रसाद बरालको स्मृतिमा दीप प्रज्ज्वलन, सामाजिक योगदानको चर्चा साथै पितृ उद्धारका लागि सन्तानहरुले गर्नुपर्ने सूक्ष्म दायित्व र कर्तव्यलाई बोध गराउँदै विभिन्न पौराणिक र श्रीमद्भागवद् गीताज्ञान प्रस्तुत गरिएको थियो ।

समाजसेवी यज्ञप्रसाद बरालको स्मृतिमा उनका छोराहरु यदुप्रसाद बराल र रविप्रसाद बरालले पोखरा–१७ बिरौटामा करिब ८ आना जमिन उपलब्ध गराई साढे २ तल्लाको बहुउद्देश्यीय यज्ञशाला भवनसमेत बनाई सामाजिक तथा धार्मिक कार्यका लागि हस्तान्तरण भएको योगदानबारे कार्यक्रममा चर्चा गरिएको थियो ।

उक्त कार्यक्रममा राम मन्दिर सञ्चालक समितिका अध्यक्ष लीलाभक्त आचार्यले सेवा नै धर्म भएको उल्लेख गर्दै कार्यक्रमको सफलताको कामना गरे । कार्यक्रमको सञ्चालन ब्रह्माकुमारी ईश्वरीय विश्व विद्यालय पार्दी शाखाका सचिव ब्रह्मकुमार शिशिर रेग्मीले गरेका थिए ।