पोखरा । जिल्ला ट्रापिलक प्रहरी कार्यालयले मोडिफाइ गरिएका सवारी साधनमाथि कारबाही गरेको छ । ट्राफिक प्रहरीले विशेष गरी कम्पनीबाट निर्माण भई आएका विभिन्न कम्पनीका सवारी साधन बिक्री वितरणपश्चात् मोडिफाइ गरेका सवारी साधनमाथि कारबाही गरेको हो । सवारी धनी एवं चालकले आफुखुसी विभिन्न सामग्रीहरु झिकेर वा परिवर्तन गरी ठुलो आवाज निकाल्ने, हेन्डिलहरु परिवर्तन गर्ने, साइलेन्सर पाइप परिवर्तन गर्ने, पड्कने बनाउने गरी समाजमा शान्ति सुरक्षामा खलबल एवं प्रतिकूल असर पारेकाले कारबाही गरिएको प्रहरीले स्पष्ट पारेको छ । सवारी दुर्घटनाको जोखिमसमेत बढ्ने हुँदा आफूखुसी सवारी साधनको स्वरुप परिवर्तन गर्ने, अनावश्यक लाइट एवं प्रेसर हर्न जोड्ने सवारी साधनलाई नियन्त्रणमा लिई पहिलेकै स्वरुपमा ल्याउन लगाई कानुनी कारबाही गरिएको प्रहरीले जनाएको छ ।