पोखरा । जिल्ला तहमा गठबन्धन बलियोसँग नकसिएपछि गण्डकी प्रदेशमा हलचल आएको छ । गोरखामा कांग्रेस र माओवादीमात्रै तालमेल गरेर जाने निर्णय स्थानीय स्तरमा भइसकेको छ भने ८ वटा बैठक बसेपछि गठबन्धन दलहरुको बैठक औपचारिक रुपमा टुंगिएको छ । स्याङ्जा, लमजुङ, बागलुङलगायत जिल्लामा गठबन्धनको बैठक अहिले पनि निरन्तर छ । तर निष्कर्ष निस्किएको छैन । त्यसो त गठबन्धभित्रकै दलहरुले माथिल्लो कमिटीलाई गरेको रिपोर्टिङ नै फरक फरक परेको छ । कांग्रेसले अधिकांश जिल्लामा मेलमिलापको प्रयास भइरहेको रिपोर्टिङ गरेको छ भने अरु पार्टीहरुले अब गठबन्धन सम्भव नहुनेसम्मका रिपोर्ट पठाएका छन् । ११ वटै जिल्लाका रिपोर्टमाथि गण्डकी प्रदेश स्तरीय बैठकमा ब्रिफिङ भएको छ ।

‘हामी गठबन्धनको पक्षमा छौं । अन्तिम अवस्थासम्म पनि पहल गर्छौं,’ माओवादी अध्यक्ष गायत्री गुरुङ भन्छिन्, ‘गठबन्धनको मर्म जे कुरामा अघि बढेको छ, त्यो पूरा हुन्छ । प्रतिगमन रोक्न हदैसम्म लचिलो भएर जान माओवादी तयार छ ।’ गण्डकीका अधिकांश पालिकाहरुमा कांग्रेस र माओवादीबीच सहकार्य हुने देखिएको छ । कास्कीमा भने माओवादीले मादी गाउँपालिकाको अध्यक्षमा दाबी गरेका कारण कांग्रेस पछि हटेको बुझिएको छ । मनाङमा पनि माओवादी र कांग्रेसकै सहकार्य हुने पक्का भएको छ ।

मनोनयन पछिल्लो दिन गर्ने सहमति गरेका छौं । सकेसम्म गठबन्धन नटुटोस् भनेर अघि बढिरहेका छौं

जनता समाजवादी पार्टीका उपाध्यक्ष हेमबहादुर थापा किरणले बैठकमा छलफलमात्रै भएको तर निर्णय हुन नसकेको बताए । ‘भागबण्डामै मिलेको छैन । प्रदेशका कुनकुन जिल्लामा समस्या छ भनेर छलफल भैरहेको छ,’ उनले भने, ‘जिल्लाहरुमा कुरा मिलेको छैन । अहिलेसम्म गैंडाकोट नगरपालिकामा ५ दलकै गठबन्धन भएको छ । अन्त कुरा मिलेको छैन भन्ने नै रिपोर्टिङ छ ।’

कांग्रेसका महामन्त्री किरण श्रेष्ठले आइतबारसम्म अझै प्रयास गर्ने र जिल्ला नेताहरुसँग छलफल गर्ने सहमति भएको बताए । गठबन्धनमा कुरा नमिलेकै कारण मनोनयनसमेत सोमबार मात्रै हुने भएको छ । एमालेले अधिकांश मनोनयन आइतबार गर्ने तयारी गरेको छ । ‘मनोनयन पछिल्लो दिन गर्ने सहमति गरेका छौं । हामी सकेसम्म गठबन्धन नटुटोस् भन्ने लाइनबाटै अघि बढिरहेका छौं,’ उनले भने, ‘तलबाट मिश्रित रिपोर्टहरु पाएका छौं । गठबन्धन नभए पनि गठबन्धनबाहेकका दलसँग भने कसैले सहकार्य नगर्ने कुरामा सबै पार्टी दृढ छन् ।’ गठबन्धनको अनिर्णयले दलहरुमा उम्मेदवारी छनोट प्रक्रियासमेत अलमलिएको छ ।