म्याग्दी । आगमी ३० वैशाखमा हुने स्थानीय तहको निर्वाचनको लागि नेपाली कांग्रेस म्याग्दीले जिल्लाका सबै पालिकामा अध्यक्षका उम्मेदवार टुंगो लगाएको छ । जिल्लाको सदरमुकाम बेनीस्थित पार्टी कार्यालयमा बिहीबार साँझ बसेको जिल्ला कार्यसमितिको बैठकले अन्नपूर्ण, धवलागिरि र रघुगंगा गाउँपालिकाको अध्यक्ष तथा अन्नपूर्णको उपाध्यक्षको उम्मेदार सर्वसम्मत चयन गरेको हो ।

कांग्रेसले मंगला, मालिका गाउँपालिका र बेनी नगरपालिकामा यसअघि नै उम्मेदवार छनोट गरिसकेको थियो । जिल्लाका उम्मेदवार छनोटमा नेपाली कांग्रेस पहिलो भएको छ ।

उम्मेदवारको नाम सर्वसम्मत छनोट भएको कांग्रेस म्याग्दीका सचिव हिराबहादुर पुनले जानकारी दिए । रघुगंगा गाउँपालिकामा बहालवाला गाउँपालिका अध्यक्ष भवबहादुर भण्डारीलाई दोहोर्‍याएर उम्मेदवार बनाइने भएको छ ।

अन्नपूर्ण गाउँपालिकाको अध्यक्षमा कांग्रेसका पालिका सभापति क्याप्टेन बलबहादुर तिलिजा र धवलागिरि गाउँपालिकाको अध्यक्षमा पालिका सभापति प्रेम पुनलाई उम्मेदवार बनाउने निर्णय गरिएको सचिव पुनले बताए ।

उनका अनुसार अन्नपूर्णको उपाध्यक्षमा ललिता तिलिजालाई उमेदवार छनोट गरिएको छ । शुक्रबार बसेको बैठकले रघुगंगाको उपाध्यक्षमा वडा नम्बर ६ की सदस्य प्रेमकुमारी पुनलाई उम्मेदवार चयन गरेको छ । धवलागिरि, मालिका, मंगला गाउँपालिका र बेनी नगरपालिकाको उपप्रमुखको उमेदवार सत्ता साझेदार ५ दलीय गठबन्धनसँग छलफल गरेपछि टुंगो लगाइने सचिव पुनले बताए ।

यसअघि बेनी नगरपालिकाको मेयरमा चिरञ्जीवी शर्मा, मालिकाको अध्यक्षमा वर्तमान अध्यक्ष श्रीप्रसाद रोकामगर र मंगलको अध्यक्षमा वीरेन्द्र बुढाथोकीलाई उम्मेदवार बनाउने निर्णय भइसकेको थियो । कांग्रेसले बिहीबारसम्म जिल्लाका ४५ वटा वडा मध्ये ३० भन्दा बढी वडामा अध्यक्षका उम्मेदवार छनोट र सार्वजनिक गरिसकेको छ ।