पोखरा । पोखरा–२२, पुम्दीकोटमा शिवमहापुराण एवं धार्मिक पर्यटन महोत्सव–२०७९ आयोजना गरिरहेको पुम्दीकोट कोट विकास समितिका उपाध्यक्ष हिमलाल बरालले महोत्सवमा भक्तजन र दाताको सहभागिता उत्साहजनक रुपमा बढ्दै गएको बताएका छन् ।

आदर्श समाज प्रतिनिधिसँग कुरा गर्दै बरालले सुरुका केही दिन न्युन उपस्थिति देखिए पनि पछिल्ला दिनमा भने भक्तजनको भीड बढ्दै गएको जानकारी दिए । काशि सुमेरुका पिठाधीश्वर जगतगुरु शंकराचार्य नरेन्द्रनन्द सरस्वती जस्ता व्यक्तित्वबाट विशाल महादेव मूर्ति प्रतिष्ठापित भई महोत्सवको उद्घाटन हुनु सम्पूर्ण भक्तजनका लागि खुसीको कुरा भएको उनले बताए ।

महोत्सव सफल बनाउन मूल आयोजक समितिले हरतरहले काम गरिरहेको भन्दै उनले स्वयंसेवक र विभिन्न उपसमितिहरुले पनि निकै मेहनतसाथ जिम्मेवारी निर्वाह गरिरहेको उनले बताए । निशुल्क यातायात तथा विशिष्ट अतिथिहरुलाई खानपानको व्यवस्थापन पनि सम्बन्धित उपसमितिले सक्दो राम्रो गरिरहेको उनले जानकारी दिए । महोस्थलस्थल कोट पुग्न साँघुरो बाटोका कारण केही समस्या भए पनि ट्राफिक व्यवस्थापनलाई ध्यान दिइएको उपाध्यक्ष बरालले सुनाए ।

महोत्सव आयोजना भइरहँदा चुनावी माहोलका कारण महोत्सव खल्लो हुने हो कि भन्ने सोचिए पनि भक्तजनको सहभागिताले उत्साह थपिएको उनले बताए । मौसम पनि कतिपय अवस्थामा केही प्रतिकूल हुँदा चुनौती थपिएको तर प्रकृतिसँग कोही जुध्न नसक्ने यथार्थ पनि बरालले सम्झिए ।

आफूहरु महोत्सव सफल पार्न हरतरहले निःस्वार्थपूर्वक लागि रहेको भन्दै उपाध्यक्ष बरालले धार्मिक र सांस्कृतिक काम भएका कारण कसैले पनि आर्थिक दुरुपयोग गर्ने हिम्मत गर्न नसक्ने बताए । पुम्दीकोटलाई धार्मिक र पर्यटकीयस्थल बनाउन सम्पूर्ण दाता र व्यवसायी तथा अन्य व्यक्तित्वलाई सक्दो सहयोग गर्न उनको अपील छ । यो क्षेत्रको विकासले सिंगो गण्डकी प्रदेश र नेपालकै अर्थतन्त्रमा टेवा दिन सक्ने दाबी पनि उनको छ । आफ्नो समितिले असल कामको थालनी गरेको भन्दै उनले सहयोगीप्रति धन्यवाद प्रकट गरेका छन् । दानका लागि पनि सही स्थल र पात्र छान्न सके त्यसले फलिफाप हुने उनको भनाइ छ ।