पोखरा । महिलालाई स्वरोजगार बनाउन बुधबारबाट पोखरामा ३ सय ८० घन्टे सहायक सिलाइ तालिम सुरु भएको छ । तालिममा २० जना महिलाहरुको सहभागिता छ । गण्डकी बहुप्राविधिक शिक्षालयले पोखरा उद्योग वािणज्य संघ र बुटिक एसोसिएसन कास्कीसँगको समन्वयमा तालिमको आयोजना गरेको हो ।

पोखरा उद्योग वाणिज्य संघका अध्यक्ष नारायण कोइरालाले तालिम शुभारम्भ गरे । उनले स्वरोजगार हुनु भनेको आत्मनिर्भर हुनुमात्र नभएर अरुलाई रोजगारी दिने सम्भावनाको सुरुहात भएको बताए ।

पोखरा महानगरद्वारा सञ्चालित गण्डकी बहुप्राविधिक शिक्षालयका निर्देशक लक्ष्मण तिमिल्सिनाले व्यवसायीहरुले करबापत् तिरेको पैसालाई महानगरले तालिममा खर्च गर्दै रोजगार सिर्जना गर्न लागेको बताए । उनले शिक्षालयले हालसम्म तालिम २ सय २० जनामध्ये १ सय ८० जनाले रोजगारी पाएको जिकीर गर्दै तालिममा बच्चाको भोटोदेखि १५ थरीका कपडा सिलाउन सिकाइने जानकारी दिए ।

पोखरा उद्योग वाणिज्य संघकी महिला उद्यमी विकास उपसमितिकी संयोजक कुमारी मुना बास्तोलाले महिला उद्यमशीलता विकासमा तालिम फलदायी हुने विश्वास व्यक्त गरिन् ।

बुटिक एसोसियसन कास्कीकी अध्यक्ष शान्ति श्रीसको अध्यक्षतामा भएको कार्यक्रमको सञ्चालन सचिव स्वेता भट्टराईले गरेकी थिइन् । तालिमको प्रमुख प्रशिक्षक गण्डकी बहुप्राविधिक विश्वविद्यालयकी मञ्जु देवकोटा छन् ।