पोखरा । पोखरा महानगरको मेयर एकीकृत समाजवादीलाई दिने निर्णयपछि पोखराको कांग्रेस आन्दोलित भएको छ । आफ्नो अस्तित्व बिर्सिएको भन्दै महानगर समितिले जिल्ला पार्टी कार्यालयमा ताला लगाएको छ ।

तालाबन्दीपछि महानगर सचिव टुवराज बास्तोला र गणेशबहादुर थापाले संयुक्त विज्ञप्ति जारी गरी गठबन्धनको निर्णय गलत भएको बताए । उनीहरुले जिल्ला कार्यसमितिसँग मात्रै सोधेर पोखराको मेयर एकीकृत समाजवादीलाई सुम्पेको भन्दै आफ्नो आत्मसम्मानमा चोट पुगेको बताएका छन् ।

‘प्रदेश र जिल्ला सभापतिलाई किनाराको साक्षी राख्दै नेकपा एसलाई मेयर पदमा प्रश्ताव गरिएको समाचारले महानगर समिति उपेक्षित भएको महसुस भएको छ,’ विज्ञप्तिमा लेखिएको छ, ‘हामी पनि विधान अनुसार निर्वाचित भएका हौं । यस्ता निर्णयले कांग्रेसका पहरेदार सिपाहीहरूको आत्मसम्मानमा गम्भीर चोट लागेको छ ।’ सत्ताभन्दा माथि उठेर आमकार्यकर्ताको मनोभावना उच्च राख्न महानगरले जिल्लाको पार्टी कार्यालयमा तालाबन्दी गरेको थापाले बताए । ‘आगामी दिनमा अपनाइने संघर्षका कार्यक्रमहरुमा आमसहमति रहने अपेक्षा गर्दै यो ध्यानाकर्षण पत्र जिल्ला कार्य समिति एवं गण्डकी प्रदेश कार्य समिति लाई पेस गर्दर्छौं,’ विज्ञप्तिमार्फत भनिएको छ ।

तर महानगर समितिका पदाधिकारीले मात्रै जिल्लामा तालाबन्दी गरेको भन्दै त्यसको विरोधमा पोखरा महानगरकै कार्यालयमा ताला लगाइएको छ । नगर कार्यसमितिका सदस्यहरूसँग सल्लाह नगरी आफूखुसी तालाबन्दी गरेको भन्दै असन्तुष्ट नगर सदस्य राजन श्रेष्ठले आफ्नै कार्यालयमा ताला लगाएका हुन् । उनले महानगर समिति विधिविपरीत चलेको भन्दै बेथितिका कारण नगर समितिले सर्वसम्मत रुपमा उम्मेदवार सिफारिस गर्न नसकेको उनको आरोप लगाए ।

महानगरले संकलन गरेको मेयर र उपमेयर आकांक्षीहरुको नाम जिल्लामा पठाउने निर्णय

‘केन्द्रस्तरबाट महानगर, जिल्ला र प्रदेशका सभापतिको सहमतिमा पोखराको मेयर चयन भएको हो । त्यसको विरोध गर्नुको कुनै औचित्य छैन,’ उनले भने, ‘नगर समितिका अरू सदस्यहरूसँग सल्लाह नगरी एकतर्फी रूपमा ताला लगाएकोमा मेरो विरोध छ । त्यसैले मैले महानगरमा ताला लगाएको हुँ ।’ उनले केन्द्रको निर्णय कार्यान्वयन गर्नतर्फ लाग्न पार्टी पंक्तिसँग आग्रह पनि गरेका छन् ।

केन्द्रको विरोध गर्न भेला भएको सभापतिको बैठकले महानगरले संकलन गरेको मेयर र उपमेयर आकांक्षीहरुको नाम जिल्लामा पठाउने निर्णय गरेको छ । ‘हामीले विधिपूर्वक संकलन गरेका नाम फरबार्ड गर्ने निर्णय भएको छ । हाम्रो संघर्ष समग्र संगठन र पार्टीको लागि हो,’ सभापति सुरेन्द्रमान विजुक्छेले भने, ‘आन्दोलन सुरु गरेपछि जिल्ला सभापतिले आकांक्षीको नाम पठाउन भन्नुभएको छ ।’ उनले अझै कांग्रेसले टिकट पाउन सक्ने सम्भावनाको आस गरेका छन् । ‘निर्णय भएको भनेर समाचार आएका छन् । कुरा बुझ्दा अझै सम्भावना रहेको भन्नुभएको छ,’ उनले अघि थपे, ‘एकीकृत समाजवादीलाई मेयर दिएपछि कांग्रेसकै धेरै मतदाता भोट हाल्न जान्नँ भन्ने प्रतिक्रिया आएको छ । यसले त वडा र उपमेयरमा पनि चुनाव हार्ने अवस्था आउँछ । त्यसलाई रोक्न हामी सचेत हुनुपर्ने छ ।’ वडा सभापतिहरुले जिम्मेवार भएर निर्णय लिनुपर्ने सुझाव दिएका थिए ।

यसैबीच, बुधबार लगाइएको दुवै कार्यालयको ताला बिहीबार खोल्ने सहमति भएको महानगर समितिले जनाएको छ । महानगरमा कांग्रेसले एसलाई नस्विकार्दा जिल्लाका अन्य पालिकामा पनि अन्योल देखिएको छ । कांग्रेसले रुख चिन्हबाट चुनाव लड्नका लागि आह्वान गरेर नयाँ विकल्प अघि सारे पनि त्यसमा नेताहरु राजी भएका छैनन् । पोखराको मेयरका लागि कांग्रेसले १८ र उपमेयरमा १० जनाको नाम बटुलेको छ भने माओवादीले दुवै पदमा ३/३ जना सिफारिस गरेको छ । एकीकृत समाजवादीले नगर कमिटीबाट ६ जनाको नाम मेयरमा र ३ जनाको नाम उपमेयरमा सिफारिस गरेको छ ।