पोखरा । युनाइटेड क्लबले आयोजना गरेको रक्तदान कार्यक्रममा ५४ युनिट रगत संकलन भएको छ ।

क्लबले १२ औं वार्षिकोत्सव अवसरमा आयोजना गरेको साताव्यापी कार्यक्रमअन्तर्गत कार्यक्रममा ५४ जनाले रक्तदान गरे ।

नेपाल रेडक्रस सोसाइटी वडा १० का वडाध्यक्ष सम्मरबहादुर श्रेष्ठले पहिलो रक्तदाता गणेश पौडेललाई ब्लडब्याग हस्तान्तरण गरी कार्यक्रम उद्घाटन गरेका थिए । कार्यक्रममा वडाध्यक्ष श्रेष्ठले युनाइटेड क्लबले सामाजिक काममार्फत आफूलाई अब्बल दर्जामा चिनाउन सफल भएको बताए ।

रक्तसञ्चार केन्द्रका प्राविधीक महेन्द्र केसीले खेर जाने रगत हरेक ३ महिनामा दान गर्नुपर्ने सुझाव दिए । क्लब अध्यक्ष राजु श्रेष्ठको अध्यक्षतामा सम्पन्न कार्यक्रममा क्लबका सचिव दिनेश सुनारले स्वागत मन्तब्य राखेका थिए । क्लबका सदस्य तथा रक्तदान कार्यक्रमका संयोजक जयराम आचार्यले धन्यवाद ज्ञापन गरेका थिए । कार्यक्रम सञ्चालन क्लबका महासचिव शान्ताबहादुर थापाले गरेका थिए ।

क्लबले १२ औं वार्षिकोत्सव अवसर पारी साताब्यापी कार्यक्रमअन्तर्गत पहिलो दिन वैशाख १ मा पोखरा १८ मा रहेको बाल सुधारगृहमा खाद्यान्न वितरण गरेको थियो । यस्तैगरी क्रमश रामेश्वरी माविमा अध्ययनरत छात्रालाई सेनेटरी प्याड वितरण, सेती खोंच एक पर्यटकीय गन्तब्य विषयक बृहत अन्तरक्रिया, सिद्ध माविका विद्यार्थीलाई साइबर क्राइमसम्बन्धी सचेतना र मौला इस्लामिक मद्रसा आधारभूत विद्यालयमा शैक्षिक तथा खेलकुद सामाग्री वितरण गरेको थियो । क्लबले वैशाख ७ मा १२ औं वार्षिकोत्सव मनाउँदैछ ।