पोखरा । पोखरा महानगरपालिकाको मेयर अन्ततः माधव नेपाल नेतृत्वको नेकपा (एकीकृत समाजवादी) ले नै पाउने भएको छ । सत्ता गठबन्धनको मंगलबार बसेको बैठकले पोखराको मेयर नेकपा एसले पाउने निर्णय गरेको नेताहरुले बताएका छन् । यद्यपि आधिकारिक निर्णय भने सार्वजनिक भैसकेको छैन ।

एकीकृत समाजवादी कास्की अध्यक्ष धनराज आचार्यले आफ्नो पार्टीले मेयर पाएको पुष्टि गरे । ‘मेयर हाम्रो पार्टीलाई र उपमेयर कांग्रेसलाई भनेर निर्णय भएको छ,’ उनले भने, ‘अब गठबन्धनका दलहरुसँग जिल्ला तहमा बैठक र छलफल हुन्छ । मिलेर चुनाव जित्छौं । नतिजा हाम्रै पक्षमा पर्छ ।’

मेयर एसले पाउने भए पनि उम्मेदवार को हुने भन्ने टुंगिएको छैन । पोखरा महानगर कमिटीले ६ जनाको नाम जिल्ला हुँदै प्रदेशमा पठाएको छ । तीमध्ये जिल्ला अध्यक्ष धनराज आचार्य र पोलिट्ब्युरो सदस्य तथा महानगर इन्चार्ज श्रीनाथ बरालबीच बढी प्रतिस्पर्धा छ । बलियो स्रोतका अनुसार यहाँको मेयर गठबन्धनबाट आचार्य नै हुने पक्का जस्तै छ । यद्यपि गठबन्धनको केन्द्रीय बैठक निरन्तर जारी छ । त्यसो त उपमेयर पाउने कांग्रेसले पनि आफ्नो उम्मेदवार पक्का गरेको छैन ।

सम्झाएर पठाए देउवाले

जिल्लाको ब्रिफिङ सुनाउन बालुवाटार पुगेका कास्की कांग्रेसका नेताहरुलाई सभापति शेरबहादुर देउवाले परिस्थिति बुझिदिन अनुरोध गरे । गठबन्धन बाध्यात्मक भएको भन्दै उनले यो परिस्थिति बुझिदिन आग्रह गरेका हुन् । ‘हामीले पोखराको बस्तुस्थिति भन्यौं । एकीकृत समाजवादी वा अरु पार्टीलाई मेयर दिंदा रिजल्ट निकाल्न सक्दैनौं भनेर रिपोर्टिङ गरियो,’ जिल्ला सभापति किशोरदत्त बरालले भने, ‘नेताहरुले सुनेर हुन्छ प्रयास गर्छौं भन्नुभयो । तपाईंहरुका कुरा सुन्यौं अब गठबन्धनका साथीहरुसँग बैठक हुन्छ । यी कुरा उता राख्छौं र निर्णयमा पुग्छौं भन्नुभयो ।’

बलियो स्रोतका अनुसार गठबन्धनबाट समाजवादीका धनराज आचार्य नै मेयर उम्मेदवार हुने पक्का जस्तै छ

बरालले अहिले कांग्रेसले टिकट नपाए संगठनको अहितमा जाने बताएका थिए । उनले कुनै हालतमा कांग्रेसले मेयर पाउनुपर्ने रिपोर्टिङ गरेको बताए । ‘कांग्रेसको संगठनको हितमा नहुने र संगठन कमजोर हुने कुरा सुनायौं । हामी ११ गतेसम्म कोशिस गर्छौं,’ उनी भन्छन्, ‘समय हुञ्जेल दबाब दिनुपर्‍यो । आन्दोलन गर्नुपर्‍यो । विरोध गरिरहन्छौं ।’

कांग्रेस गण्डकी प्रदेश सभापति शुक्रराज शर्माले पनि नेताहरुले राम्रोसँग परिस्थिति नबुझेको बताए । ‘हाम्रा कुरा राख्यौं । जिल्लाको अवस्था भन्यौं,’ उनले भने, ‘दोहोरो कुरा हुन पाएन । हामी कुरा राखेर पोखरा फक्र्यौं ।’ उनीहरुले देउवासहित नेताहरु रामचन्द्र पौडेल, पूर्णबहादुर खड्का, ज्ञानेन्द्रबहादुर कार्की लगायतसँग भेटेका थिए । ‘अहिलेको परिस्थिति र बाध्यता हो तैपनि हामी मिलाउन खोजिरहेका छौं भन्नुभएको थियो,’ बैठकमा सहभागी पूर्व मन्त्री यज्ञबहादुर थापा भन्छन्, ‘भएन भने पनि कन्भिन्स भैदिनुस् भन्नुभयो । हामी कन्भिन्स नभइ फर्कियौं ।’

कांग्रेसले समाजवादीलाई मेयर नस्वीकार्ने भन्दै सोमबार विज्ञप्ति निकालेको थियो भने पालिकाले आ–आफ्नै उम्मेदवार सिफारिस गरेका छन् । पोखराको मेयरका लागि कांग्रेसबाट १८ जना र उपमेयरमा १० जना सिफारिस भएका छन् । त्यस्तै, माओवादी केन्द्रबाट मेयर र उपमेयरमा ३/३ जनाको नाम प्रदेश कमिटीमा सोमबार सिफारिस भइसकेका छन् ।

अरु पालिकामा के हुन्छ ?

पाँच स्थानीय तह रहेको कास्कीमा पोखराको मेयर एकीकृत समाजवादी र उपमेयर कांग्रेसले पाउने भए पनि अरु पालिका भने अझै अन्योलमा छ । मादी गाउँपालिका यसअघि नै माओवादीले दाबी गरेको छ । पोखराको मेयर पाएपछि समाजवादीले माछापुच्छ्रेको दाबी छोड्नेछ । जनता समाजवादीले अन्नपूर्णमा दाबी छोडेको छैन । पोखराको मेयर नपाएपछि कांग्रेस र माओवादीले अरु पालिकामा झनै बढी दाबी गर्ने सम्भावना छ । २०७४ मा एउटा मात्रै पालिकाको अध्यक्ष जितेको कांग्रेसले अन्नपूर्ण नै छोड्ने सम्भावना लगभग छैन । यसबाहेक कांग्रेसले २४ वडामा जितेको छ । माओवादीले मादीका ३ वडामा चुनाव जितेको थियो भने बाँकी एमालेले जितेको हो । गठबन्धनको बैठक मंगलबार बोलाए पनि कांग्रेस र एसका नेताहरु नभएपछि स्थगित गरिएको छ । अर्को बैठक बुधबार डाकिएको छ ।